بقلم / الدكتورة تماضر الحسن
إختصاصي الأمراض النفسية والعصبية
ام جركم هي الجرادة
ومعنى المثل ان الجراد بموت ومابعيش لعامين …
جالت هذة العبارة براسي وانا جلوسا هذا المساء في محطة قطارات ادنبرة تلك المدينة الوادعة الخضراء المبنية علي قمة جبل علي مااظن بكنائسها وقلاعها وبيوتها العتيقة ذات الشرفات المعلقة والجو يفوح فيه رايحة الطعام الاسكتلندي الشهير… طعام علي قول امي طعم وشوف …
فهم اناس ذواقة هؤلاء الاسكتلنديين طيبين وكريمين ووناسين بتلك اللكنة اللطيفة ونطقهم الذي يشبه طريقة كلام ( اللجن ) عندنا
جلست ارقب فلول الناس المحتشدين في المحطة بعينين هداهما طول السهر ..والسكني داخل الكتب ..
.سيدات ورجال كافة الاعمار والاشكال في كامل اناقتهم و(ابهتهم ) …مافي شناف كلو كلو …
سيدات تجاوزن ال60 وطالعات في الكعب العالي في امانة الله وفي كامل زينتهن من دون ان يخشين وجود البقول (بالله شوف المرة الكبيرة المابتخجل دي كان تمشي تشوف ليها صلاة تنفعها ) …
ورجال اشتعل الراس شيبا ولازال بالاعين بريق الصبا يمشون بنشاط باحذية رياضية وبناطلين كاشول وتيشيرات فاقع لونها تسر الناظرين .
.لفت انتباهي مجموعة من السيدات والرجال من ذات الفئة العمرية (المشنفة ) وضحك شديد واخر بهجة ويبدو ان بينهم شركاء واحباء من طريقة مماسكة اليدين والتربيت ومرة مرة كدة نظرات (حنية ).
وعجبت لنا
والله عجبت لنا …
بدري بدري تلملم اشياءك من هذا العالم وتتخارج وانت لسه حي …وجنس المثل المحبط دا حايم قدامنا زي الشافع (قليل الادب ) لايمكنك التمرد علي ثقافة مجتمع تضعك في خانة اليك وانت لسه بشراك ونداك وانت اصلا بتكون ضيعت زهرة شبابك تلهث وراء الكتب وتحاول ان تجد موطيء لقدميك وسط هذا الزحام الكوني المرير ..
ولمن القصة تروق تكتشف ان الجراد لاياكل خريفين وتحال اوراقك الي الاردن للعلاج والحج والدار الاخرة طوالي بعد داك ..لانو نحنا اغلبنا بتسهل مع عمر النبوة في بداية ستيناتك …يعني ببساطة هذا الجراد ولا حيلحق ياكل خريف واحد حتي …
عجبت لعدم احتفاءنا بالحياة
حتي الضحك تجد ماخذ عليه في الثقافة المحلية
الضحك بلا عجب قلة ادب
وجاني من هناك يتكشم زي نار القصب
ودا زول ماسكاهو ام فريحانة (كانو مفروض تمسكو ام زعيلانة يعني )
عجبت لتجريمنا للفرح والانطلاق (الانطلاقة) وعيشك حر كما تحب وتشتهي وتود لبت ام روحك دي ( ومن هنا جاء لفظ المتحررات والمتحررين والتحرر ) حكمة ربنا كانو نبذة مع انو شعوب بتناضل سنين عشان تتحرر نحنا بنجاهد عشان (نتقيد) ونقيد من يتحرر مننا باقصاءه وتجريمه …
حتي الشيء الفيه مظاهر الفرح… والحفلات المسجلة توريك الحاجة دي كانو الناس في ماتم … لا حركة ولا شيء يدل علي الموسيقي دي هبشت حاجة فيهم …
العروس الكل يحمر ليها لو رقصت او حتي ابتسمت وتتهم بانها (فرحانة ) في يوم زي دا … مفروض تكون زعلانة ومكتئبة الصراحة
في زول حيجي يقول لي دا كان زمان …
بس لسه في ناس بفتكروا انو دا (عدم ادب ) … وخفة منها
ياخ نحنا وكت نفرح شديد العريس يطلع سوطو (يمحط) المعازيم ودي انا لاسي مالاقيه ليها تفسير …
الاغرب من دا كلو النوم …
اي والله النوم الواحد دا
تقول لزول انت كنت نايم ولا شنو
يرد عليك بنفي وبشدة كمان
لا والله مانمت او ماكنت نايم
بعضهم يظن انو من عدم التربية الزول النوام او البحب النوم ولا يقل عنه جرما البحب الاكل …
مع انه الدواء يمنح للشخص لكي ينام اذا عندو مشكلة نوم ..
المهم دا كلو لف في راسي وانا بعاين للخلق دي
انا طوالي عملت اجتماع مع روحي ورفعت توصيات الا وجود لهذة المقولة (العويرة ) المحبطة في حياتي اطلاقا …وانشاءالله خريفين وربيعين وشتاءين لحدي ماصاحب الوداعة ياخد وداعتو …
مع الايام السعيدة دي ورمضان بدينا في فقاه الحلو دا …
ان شاءالله دايما سعداء قولوا اميييييين
وكل خريف وانتم جراد يحتفي بمواسم اكثر بهاءا ونضرة وحب .
تماضر
تمر الرضا
إرسال تعليق