بقلم/ د. تماضر الحسن
“اختصاصي الطب النفسي”
الحياة دي بنعيشها مرة واحدة …
ولنا الحق اننا نعيشها صاح وباقل الاضرار النفسية والجسدية الممكنة مع من يستاهل ان نعيش من اجله ونديه حباب عيونو ونقضي معاه باقي العمر
بس لازم وحتما يكون هناك في مقابل …
المقابل دا قد يكون مادي او معنوي
وردة
خاتم ذهب
كرت
حضن
ابتسامة
عبارة لطيفة
نظرة عين
تربيتة
شكرا جزيلا
بس لازم يكون هناك محفز ….
منك … ومنه
اهم شيء انو الاتنين تكونوا ممتنين ومقدرين وشاكرين
سيداتي العزيزات …
التظاهر بالسعادة والرضا واقناع النفس بانو كل شيء تمام التمام وتظهري امام الكل وانت مبتسمة ومحننة ومدخنة …عيالك شطار …وبينكم سمح …وراجلك قيافة وعربيتكم هنا وهناك …دا كلها حاجات متيريالستك … مغرقة في ماديتها … كل البتعملو انها
Ticking boxes
بتخت علامة صاح قدام مقومات السعادة البتفترضها المجتمعات
اشبه بزول لابس جزمة ماركة (عذرا للتشبيه) بس ما لقيت شيء بوصف الاحساس دا غيرو …. حذاء براند وتمنه خرافي… حلو وبلمع … جلد اصلي … وقيافة اخر حاجة والناس حاسداك عليه …
وانت اللابسُه واجعك ومطلع عينك … وضاغط علي صباع رجلك الكبير ومافي زول حاسي بشيء
الحاجة دي وجعها ما بتعرفو الا انت واي زول حواليك يقول ليك انت مالك مابتحمد الله …في حين انت الوحيد العارف اذاها وتعبها وقبحها وممكن تكون مستعد تبدلها بسفنجة مقطوعة وبنشوف دا في حالات كتيرة لما يتم الانفصال بين ازواج مصنفين عن طريقنا انهم اشيك والطف واحسن جوز في الدنيا ….
بس ما نافعين مع بعض …
دا بالضبط الزواج …
نجاحه من عدمه ما عندو علاقة بنظرة الناس البرة ديل ليهو
المهم احنا الفيه ديل بنعاين ليهو كيف….
الزواج عبارة عن جهنم لما يحصل مع زول مامهتم بيك وما بدعمك … وما بقيف حدك لمن تكون انت محتاج ليه
و البظهر عليه الاستغناء
والزهج منك ….
وممكن يوريك ببساطة انو ممكن يقاطعك ويخاصمك وانت مافارق معاه في شيء ….
يهددك بالهجر والقطيعة والبعد في كل منعطف
دايما طافيك … ومثبط لهمتك … ومقلل من ثقتك بنفسك …
حريص علي انو يخليك مرتبك وما متاكد
مافي تقدير لاي شيء انت بتعمله.. يفتش عن الثغرات والعيوب … مقل في محبته زي مطر الشتاء….
ما برضي ومابفرح كان اوقدت صوابعك العشرة شمع …
كل ماتدي هو داير اكتر …
بشوش ومبسوط مع غيرك ومعاك متكدر وزعلان وزهجان … اي كلام تقوله انت غلط … واي حكي بتم تفريغه من محتواه وتتم اساءة الظن بيهو ….
دايما انت في نهاية لستة اهتماماته … ما بتذكر اي شيء يخصك … وما بحرص علي عمل اي شيء يخليك سعيد …
بل بالعكس بتفنن في اتعاسك ..وما بفوت فرصة ممكن من خلالها ينتقدك … ويهينك ويصغرك…
الشعور الكعب دا بتقازم قدامو اي شيء تاني ممكن يلاقيكم في الرحلة المفروض تكون طويلة دي … اي شيء دي بمعني الكلمة
زي عدم القروش والفلس
مشاكل النسابة
التعب من الحياة وتحدياتها
عدم الانجاب
دا كلو مقدور عليه في وجود الشريك البحبك وبحن عليك وربه في السما وانت في الواطة … الما بنوم قبل ما يقول ليك قولا او فعلا انه يحبك وانك تساوي الاف النجمات ….
يتبع
تماضر
تمر الرضا
#مع_تماضر_تمرالرضا
إرسال تعليق