رجعت من السعودية رجعتي الاخيرة دي لي قريب شهر وشوية ..مع انها اجازة كلها ما تامة تلاتة اسابيع ..
كمية المستنيني والمحتاج اني اشوفه يحير لدرجة لاسي مافضيت شنطي …
محل ما اعاين القى شيء راجيني
تلفون اضربه
مشوار اعمله
مواعيد امشيها
الواحد لمن بقى رهيف من شدة ما ملهله وروحه مارقة …
ادفع والله نص عمري واعرف اللاقين زمن للمشاكل وسك بعض والقوالات وعمل معارك في غير معترك .. والمتفرغين لغيرهم ديل بلقوا الزمن وين
والله مستعدة اشتري منهم كم ساعة اذا اصلا عندهم زمن للبيع ..
الغريب انو في ناس بقعدوا بالساعات في العالم الافتراضي دا بديروا فيه معارك وبستنوا ناس يظهروا عشان ينبزوهم ويشاكلوههم ..
يفتحوا بيهم بوستات…
يستنوا ليك الغلط عشان يرازوك بيه ..
يباروا البشرية دي زي ضلهم … لا تعرفوا تعلق مرضي
ولا كراهية اعيت من يداويها
وبنقلوا مشاكل هنا للدنيا الببره … عداءات .. تعقب .. اجتهاد عجيب
السؤال الذي حير العلماء
لو اتوفر ليهم الزمن باعتبار انهم فاضين ..
الحيل والقدرة والمروءة والاعصاب دي جابوها من وين
والله ما حسادة مني بس فعلا. المخزون الاستراتيجي دا وين مكانه بالضبط !!!
علي نسق الكيماوي وين !!!!
اها
الحيل والمروءة دي وين !!!!!
الحمدلله
تماضر
تمر الرضا
إرسال تعليق