روشتة عامة للحالة النفسية التي يمر بها السودانيون في زمن الحرب

بقلم الدكتورة / تماضر الحسن
إختصاصي الأمراض  النفسية والعصبية

مع ظروف الحرب والتحديات التي يمر بها الناس والتي
اثرت سلبا علي صحة الناس النفسية باختلاف اعمارهم ..

كترت في الاونة الاخيرة الاستشارات التي لها  علاقة بالامراض النفسية وبالذات حالات الانتحار …
روشتة عامة للسائلين والباحثبن عن (وصف) لحلول المشاكل الزي دي

التلي ميديسن او المعاينة الطبية عن طريق التواصل البعيد موجودة في الطب النفسي ولكن في امراض بعينها
الانتحار واحد من الطواريء الموجودة في الطب النفسي زيه وزي الذبحات والشلل في الطب العضوي محتاجة تدخل سريع ودا المعاينة عن بعد ما بتقدر تحله ..

يعني مافي زول بقدر يعالج االانتحار تحديدا بالمسجات او بالشات او بالمسنجر او بالكتابة ..
اذا كان الشخص عندو افكار انتحارية او معاك شخص بفكر انو ينتحر
الدكتور النفسي لابد ان يراك راي العين ويكلمك برضو وجه لوجه … يعني فهم انو الزول عشان عندو مرض نفسي ماضروري يلاقي الدكتور دا ماصحيح …

عليه ..
الانتحار هو الفيصل في الامراض النفسية … دا واحد من الاعراض البتم التعامل معاها كحالة طارئة جدا … ومافيه هظار … يعني لو زول قال ليك انا عايز انتحر مافي طريقة انك تشكك في نواياه او تتعامل معاها علي اساس انها (حركات ساي) ومابعملها …. اي زول يبدي رغبة في الانتحار او يشرع في الانتحار في الاغلب بينجح في القصة دي … اول ماتسمع انو الزول المعاك دا داير ينتحر مافي طريقة تجي تسال في السوشيل ميديا عشان اي زول يجي يكتب ليك كلام من وجهة نظرو الشخصية في مسألة بالاهمية والخطورة دي … طوالي تسوقه حتي ضد ارادته وتوديهو لدكتور امراض نفسية وبسرعة كمان وتجنب النصح والارشاد والترهيب والتخويف لانه في لحظتها مابكون حاضر الذهن عشان يستوعب كلامك دا ….

لا المرض النفسي ضعف
ولا الانتحار عدم ايمان بربنا او ياس من رحمته
ولا في زول بختار انه يمرض او حتي ينتهي من حياته
لا تعاتب زول زي دا ولا تديه موعظة دينية ولا تخوفه من عقاب ربنا اذا انت فعلا عايز مصلحته وحابي انك تشوفه بينكم

الشفاء لكل المرضي