وبعد عام من كتابة هذا البوست علي نسق (اني ارى شجرا يسير)…
كيف تكسب امتنان وشكر من تقهره؟
_____________
بقلم / الدكتورة تماضر الحسن
“اختصاصي الأمراض الفسية والعصبية”
من الحيل النفسية المعروفة اذا حبيت تركع بني ادم وتكسر شوكته وتخمد نار تمرده ورفضه وعصيانه وثورته علي شيء هو يعيشه..انك بصورة عملية توريه انك ممكن تزيد من النار الهو فيها عشان يتمنى انو يرجع لناره القديمة ويحمد ربنا عليها ..
او توريه انو الاسوا قدام اذا فكر انو يتحرك قيد انملة من القفص الهو فيه دا ..
بعد ما يزيد نارك ، هو الحيمد يده يشيل الحطب الختاه فيك دا بنفسه عشان يوهمك انو ساعدك
ويخليك تدين ليه بالولاء لانو لا احد الا انت قادر علي ان ياخد بيده غيرك انت..
وممكن يرجعك لوضع اسوا بشوية من الانت كنت فيه ويخليك كل الوقت تتمنى ترجع للانت رفضته وتتحسر علي رفضك وصياحك واعتراضك وانت ما بتحمد الله سيدك ..
قصة الراجل الدخلوه في اوضة واحد في اربعة
قعد يكورك
الدنيا حر وانا تعبان امرقوني
طوالي دخلوا ليه حمار
روحو مرقت من الريحة ومن الحمار وضيق المحل ..
بدا يلز في الحمار عشان يزحه
طيب سوقوا الحمار من هنا ..
قالوا ليه الحمار دا جابو ليك زول تاني مااحنا
مع انو عمك عارف انو الحمار حقهم
لكن عشان يتخلص من عبء الحمار بدا يقتنع بالعدو الوهمي دا ويلومه بدل يلوم صاحب الحمار الحقيقي ..
طوالي دخلوا ليه غنماية
بقى متمني بس لو كان هو والحمار من البتعمل فيه الغنماية
طوالي جابو ديك النوع البتجارى داك
في الحتة الضيقة
خلوا عمك دا وصل الرمق الاخير
نفس الدخله في الاوضة الضيقة جاء ساق الغنماية والديك
عمك قعد يبوس في يده ويشكره علي الاوضة ومعاها الحمار .. ..
واتعامل مع نفس الجهة انها المخلص والمنقذ والعايزة مصلحتك …
وزعلان وبلوم روحه انو كان مفروض يقبل بالقبر الكانو مدخلنو فيه علي الاقل حمار مافيه ..
بقدرة قادر اتحول للجاني والمذنب والمفروض يتعاقب
والجاني هو المنقذ والمخلص ..
تماضر
تمر الرضا
إرسال تعليق