الناس بقت عايشة للتنظير و دفع الفواتير

لحدي عمر 10 سنين كنا بنسمع المقولة (اتعب في العشرين ترتاح في الأربعين).. يمين الله وما طالبني حليفة ذاتو نحنا خشينا التلاتين بتراكمات الـ80 والموضوع لسه جااااري شديد

أنا دايرة أزرع حواشة سمسم وحواشة قمح وأفطر في أبو عشرين كسرة وطماطم أقطعها بالمنجل.

استايل المجتمع الجديد فرض علينا مصاريف غريبة ذاتها والله
أنا لا دايرة Skin Care Routine ولا دايرة ماتشا خضراء زي الملوخية الأخدت نار كتيرة و ما دايرة Mug أنا دايرة جك

أنا دايرة حواشة وموية في أبو عشرين وكسرة سخنة وطماطم و عجور و فرشة بلاستيك تحت شجرة خاتين فيها القهوة أنا و أبو عيالي (نحاحي) الطير من بعيد و بناتنا يلعبوا بالطين و غنيماتنا و جداداتنا يعزفوا ليل نهار
المطرة تصب أدخل الويكة جوة المطرة تقيف أطلع الويكة برة
و أرفع ليكم فيديوهات الريف و ملاح البامية الما خمج و انتو تشبكونا ماشاء الله تبارك الله و كل ٦ شهور نجي الخرطوم نظام البندر و كده
والباقي على الله
الجاي في العالم ده (شعر ما عندنا ليهو رقبة )

ده شنو ده يااااخي الناس بقت عايشة للتنظير و دفع الفواتير و عمرها يطير .

نشوة أحمد الطيب

“صحافية استقصائية”