الصمت العقابي بين الحميمية والرومانسية

من إرشيف الكاتبة

بقلم/ الدكتورة تماضر الحسن

إ”ختصاصي الأمراض النفسية والعصبية”

قبل كدة كتبت عن انو الواحد ما يضمن وجود من هم حوله لانهم بحبوه ومابقدروا يعيشوا من غيرو .. تعتقد انك ممكن تجيهم راجع وقت ما تحب او تحس انك متاح ..
انا حابه اتكلم اليوم عن الاسوا اطلاقا في العلاقات بين الناس وهو الصمت العقابي
او مايعرف بالانجليزية ب
silent treatment
والصمت العقابي هو رفض التواصل الكلامي او الفيزيكال او اي نوع من انواع التخاطب مع شخص وفي الغالب هو مقصود منه العقاب او التلاعب النفسي او الكنترول والتحكم في الشخص الانت بتعاقبه…

النوع دا من السلوك موجود بكثرة في العلاقات الفيها نوع من الحميمية او الرومانسية. .. وبرضو بحصل بين افراد البيت الواحد .. الاصدقاء .. او الزملاء في العمل ..

الصمت العقابي يعتبر نوع من انواع الايذاء النفسي او العاطفي الحقيقي
الابحاث والدراسات اكدت انو الشخص البتم معاقبته بالصمت بتم تهديد انتماءه للعلاقة وتقديره لنفسه .. التحكم .. والوجود الفعلي في حياة البصمت عنك او بحاربك .. وبحفز عنند المعاقب الشعور انو البحبك وبهتم بيك ماعايز معاك اي شيء او انت لا تعني بالنسبة ليه حاجة ..

الصمت العقابي لا يعني اطلاقا انو في غياب حقيقي للتواصل .. في الحقيقة هو صوت عالي جدا ومزعج ومؤلم وبلغي احساس التاكد انك واقف وين من العلاقة ومن الشريك فيه اذي بالغ. ووجع شديد ..

وبين الشركاء بكون مصحوب بالبعد عن العلاقة الحميمة والاحساس بالمحبة

الصمت العقابي هو
red flag
في العلاقات ..
الصمت العقابي هو واحد من التكتيكات المعروفة البستخدموها النرجسييين للتلاعب بمشاعر القدامهم لمزيد من التسلط والتحكم والتخويف وانو ياخد من ثقتك وتقديرك لذاتك
لانو الصمت ايحاء بعدم الرضا والزعل وانك عملت حاجة زعلته وبتجي دايما عبارة
( يعني انت ماعارف عملت شنو)

يبدا القدامك في حالة من الحزن والتوهان والبحث وجلد الذات والتفكير .. انو انا عملت شنو او ما انتبهت للانا عملته ..

الصمت العقابي. ممكن يستمر لساعات .. ايام .. واحيانا شهور .. البعاقبك بكون مستنيك تجي راجع تعتذر وتصالحه من حاجة انت اصلا ماعارفه شنو ودي وسيلة لارضاء غروره واحساسه بالتحكم بيك وبمشاعرك .. ومعروف انو مدة الصمت دي اذا انت ماكسرتها بانك تخاف من طولها قد تمتد ..

الصمت العقابي المقصود منه الايذاء .. واذا كان البمارس في الصمت العقابي شخص نرجسي تجاهك بصل حالة من الغضب الشديد اذا انت اتجاهلت الصمت ومااستجبت .. الصمت العقابي يمارس من غير النرجسيين ايضا ولكن كل من يمارسه عنده نزعة شديدة للايذاء النفسي ..

كيف ممكن الشخص يتعامل مع شريك ينتهج الصمت العقابي ..

اولا بانك تعطي مساحة للاخر في انه يسكت وماتزيد الموضوع بالعراك والمشاكل والكواريك والسؤال انت ليه ساكت

تانيا ما تتحمل مسؤولية السكوت دا وما تعتبر نفسك سبب فيه علي الاطلاق
دا امر يخص صاحبه

اذا استمر اكتر من اسبوع علي الارجح .. اختار الوقت المناسب لانك تسال الشخص من السبب في التصرف دا ونبهه انك ترفض النوع دا من التعامل واخبره انو التواصل بحل الاشكال وريه انو الصمت دا ممكن ينهي البينكم وتماما .. واذا هو بس عايز مساحة لنفسه فله المساحة دي من غير انه تطول وتبقي عائق قدام العلاقة لانو دا حيوقف العلاقة من الاستمرار ..

اذا الشخص ما رد عليك ومااستجاب فدا بوري عدم رغبته في الحديث وانت مامضطر تنتظر ..

في الاغلب الرجال بستجيبوا للصمت والمسافة العاطفية اذا ما سمعوا من السيدات لزمن ما .. بحاولوا يتواصلوا ليعرفوا اذا انت مفتقدهم ولا لا وعشان يشوفوا قيمتهم عندهم .. النساء الصمت يجعلهن اكثر بعدا وخوفا

الصمت العقابي بحطم الثقة والمحبة بين الشركاء والمحبين
بين الوالدين والابناء وافراد الاسرة الواحدة
بصنع الفجوات وبزيد من البعد

بحرم الموجودين تحت سقف واحد من المودة والمحبة .. الكلام هو البخلي شجرة الحياة تستمر

كل المحبة
تماضر

تمر الرضا