بقلم / د.تماضر محمد الحسن
“اختصاصي الأمراض النفسية والعصبية”
قصة اهتمام بعض الرجال الشديد باي شيء يخص السيدات دا جاي من وين بالضبط !!! وسببه شنو !!!
في رجال في الميديا دي عندهم متابعين قريب المليون محتواهم بس نبز للنسوان … والبعملوا ليهم تاق عشان ينبزوا النسوان رجال برضو
وكتار جدا فيديوهاتم عبارة عن التعليق علي لبس البنات وتسريحة الشعر وطريقة الكلام …
واحدين بوروا السيدات كيف يخلو الراجل ينتبه ليهم ويحبهم.. .. اعملي كدة وما تعملي كدة لو عايزة راجل يحبك …
لو كتبت انو في حفلة نسائية يجوك الالاف جارين ليه عاملين حفلة نسائية وجايبين ليكم راجل في نصكم!!!
مع انه اخوانهم الرجال في جميع انحاء المعمورة واقفين قدام الفنانات بكاميراتهم وتلفونات بنكك للنقطة وبقطعوا في لساتك القروش في تصرفات قمة في السفه والعبط في حفلات عبارة عن رجال والفنانة هي الانثى الوحيدة بينهم من غير زول منهم يعلق علي المساخر دي … ولا حتى فيديو واحد بناقش الظواهر المجتمعية السالبة دي..
كتار جدا متابعين سيدات في الميديا دي للاستقصاد والاساءة والشتم والتنمر ما لاي سبب تاني … اي زولة ممكن تكون بتكتب او بتتكلم بشيلوا بوستاتها او فيديوهاتها والتنمر عليها والاساءة ليها لاخراسها …
قاعدين في قروبات البنات باسماء مستعارة .. بعلقوا علي بوستات معمولة للسيدات فقط والمواضيع البتم الكلام فيها تخص السيدات تماما ومستحيل تثير انتباه راجل …
دا تفسيره شنو بالجد !!!
دا نوع من عدم الموضوع… ولا فعلا هم غلبهم اليعملوه فيما يخص رجالتهم دي … لانو معظمهم فعلا ما شغال ودا الشاغلهم
غايتو الجات للبلد دي فعلا تختاها
تماضر
تمر الرضا
إرسال تعليق