بقلم/ الدكتورة تماضر الحسن
“اختصاصي الامراض النفسية والعصبية”
صباح الخير..
في زول مرة سالني : انت ما عندك ناس بنبزوا ليه زي باقي الصفحات الفيها ناس كتار !!! وناسك كلهم طبالين ولا شنو !!!- يقصد صفحتي بالفيسبوك- كأنه دا الصاح او المفروض يحصل انو البجي عندك لازم يكون فيهم ناس بيسئوا ليك ..
انا طبعا اكتر زول في الميديا دا ببللك الناس …قبل فترة الفيس بوك مرسل لي انو عدد البلكتهم تجاوز التلاتة مليون … هل مفكرة ارجعهم ولا دا قرار نهائي
معظمهم نفس المشكلة البذاءة والكلام الفاحش والتعقب وسوء الادب
فلك ان تتخيل انا بس مبلكة تلاتة مليون وشوية دا اسلوبهم وسلوكهم …
البقى دارج وموجود. انه في بعض الرجال الموجودين في الميديا عندهم استعداد دايم ومتواصل للاساءة والشتم والنبز بكلام خارج وفيه ايحاءات جنسية. ودا موجه بس قصاد النسوان البكون عندهم محتوى بحاولوا يقدموه .. وفيه في الاغلب توعية وتوجيه وخطاب بكون جاد….
اتخيل لي النبز بكلام قلة الادب عشان الواحدة تخاف وتتدسى منهم وتسكت من الهي بتتكلم عنه
و ماعندهم مانع انهم يتواجدوا في صفحات اخرى ممكن يكون اصحابها من الجنسين بقدموا في محتوى فبه البنبزوك بيه دا بوضوح ومن غير مواربة … ماعندهم اي مشكلة مع الحاجة دي بس اول ماانت تكتب او تعمل فيديو بكونوا حريصين علي التواجد والمشي وراك والاساءة …
والاغرب طبعا هو انو الحولك شايفنهم …مافي زول بقول ليهم دا سوء. منكم ولا بحاولوا يوقفوهم
بس الله يقدرك رد
بطلعوا من كل فج عميق عشان يقولوا ليك ما ترد
ما تنزل لمستواهم
ما تبلكهم
خليهم عشان يستفيدوا من الانت بتقوله
اسي كلام الزول دا فيه شنو !!! اتقبلوا الراي الاخر
وبكونوا مستمتعين بمتابعة المعركة القدامهم دي ..
انا اخدت قرار بانه الزي ديل مستحيل يتواجدوا في حتة انا فيها.. ولو لقيتهم بنبزوا في زول في محل تاني برضو حابلكهم … ولو مشوا عملوا حسابات تانية البستهم جلدا بدل الذي نضج وتاني بلوك…
ومن هذا المنبر. كامل الدعم و بحيي اي سيدة بتقدر تقيف ليهم ونرد عليهم. وتديهم الفيها النصيب طالما هي قادرة انها تعمل كدة علي الاقل معلومة انو النسوان بخافوا من كلام قلة الادب دي تنتهي … واعترف بعدم مقدرتي اني اعمل كدة … لكن اي واحدة قررت انها تخوض معاهم معاركهم دا فلها ماارادت.
الميديا دي غايتو فضحت اخلاقنا تماما كشعب وورت انو في كتار من رصيد الاخلاق ما بملكوا قرش واحد
تماضر
تمر الرضا
إرسال تعليق