عندما كان القلب اخضر زي الجروف، وكانت الأحلام صغيرة

(لمن كنت صغير و بلعب بالتراب)

بقلم / تماضر الحسن

“اختصاصي الطب النفسي”

كلما الحياة ورتني رعونتها وسوت لينا الشناة، اشتغلت هذه الارجوزة الطفولية (لمن كنت صغير و بلعب بالتراب)  )
جوووووه مخي تلولي قلبي الفاري بحداهم
ترجع لي شيء من رحمن الذات
كلما الحياة عصرتني الواحد مشي و”اتكرفس” هناك في رحاب ذكريات حلوة زي قصب السكر
دنيا كانت ساهلة جدا وبسيطة من غير كلفة..
الاحلام نفسها صغيرونة وحتة كدة .. زي قطعة الباسطة في صحن العشاء..

القلب اخدر زي الجروف
والصحبة تشبه كورة اللبن
دافية وحنينة وتملاك عافيه
اليوم طوييييل
مبروك
تعمل فيه الدايره ولسه فيه باقي
يرحمنك وييقنك

من اذان الفجر
ونفس الصباح المخلوط بالبخور
صوت همهمات الكبار وهم بصلوا وهمس الدعاء بالخير والبركة والعمار
لهبايب الصباح النعسانات ديلك من ورا سحاب يشيل ويدس في عين الشمس
مره جاي ومره جاي
هزة الكانون
وريحة قنانة اللبن الدفرت وخشت جوه مغارب الحلة

ووش امي البشبه صباح العيد لا تكشيره ولا زهج
حسن عجيب … وجمال شديد
واحنا مرصوصين زي كبابي الشاي حوالينها
الورجغة واللزليز والمكاواة

بتريدي منو اكتر
انا اول زول بسال السؤال دا
قولي بتريدي منو اكتر
وتضحك صاحبة الحسن والجمال والدلال
اميرة عرش قلبي في كل المواسم والفصول..
حضن احفظ تفاصيله
وقلب اكاد المس وجيبه المنساب علي وجهي حتى كتابة هذة الاسطر
وريحة نفسها .. نفس الرحمة
ريحة امي الحدي اسي ساكناني … ريحة الامهات .. شيء من عبق الفراديس ولفح عطر الجنان ..

كبايتين واحدة حقت شاي والتانية ببردوا فيها
نان ما تصبري
واضحك انا
قرقراب .. وونسة …
لافي شكل لا زعل …
تربية المحنة والعصرة والقلدة
والله يهديك

النور المن جوة القلوب بنور قدامنا لحدي بلد الخواجات دي
ضلهم .. المافيه رقراق
سنقرئك فلا تنسي
كيف لي ان انسي
وانا ذاكرتي صيغت من وهج
ومن ضوء
ومن رحيق
انا بت الريدة والشوق
وتربية العجن والدلال والاحضان

بشوف الدنيا بعين المحب .. دنيا ما بخشها ضلام
لا بتعرف علو الصوت
ولا فيها محل لكواريك

مافي كراهية ولا ضغاين
لانها ما بتعرف الا تحب ..

انا
بت الفريق والنفاجات والشموس

بتهم .انا وبت الحيشان الفاتحات علي القبل الاربعة اينما تتدركك المحبة فسم وجه من تحب ..

اه يا دنيا

تماضر

تمر الرضا