بقلم / الدكتورة رناد ابو كشوة
مدير مركز ابو كشوة لتطوير الزراعة
كل سنة بتزيد السماد… لكن الإنتاج بينقص؟ خلينا نقول ليك السبب الحقيقي
يا مزارعنا الصابر.. عارفنك بتشقى، وبتدفع الملايين في التقاوي والسماد، وفي الآخر الحصاد بيجي أقل من طموحك وسنة ورا سنة الإنتاجية ماشة في النازل. بتقول الأرض “تعبت”؟ الحقيقة إنو الأرض ما تعبت، الحقيقة إننا بنسقيها “دواء غلط”.
عارف إنو شركات البذور العالمية الليلة بقت ترفض تبيع بذورها للسودان إلا لما تحلل التربة؟ لأنهم ما عايزين يدخلوا في “لعبة خسرانة” عارفين إنو أرضنا بقت “قلوية” زيادة، وده هو “السد” الواقف بين نباتك وبين الغذاء.
نحنا في أبو كشوة بدأنا نطبق العلم ده، وجينا نقول ليك: أدي نفسك فرصة تجرب. ما توقف نظامك القديم في كل أرضك، جرب في فدان واحد بس بطريقتنا، واحكم بنفسك في نهاية الموسم.
1️⃣ ليه “الداب” بقى ما نافع في أرضنا؟
أرضنا السودانية تميل للقلوية، والداب لما تذوب حبيباته بتعمل حولها منطقة شديدة القلوية. النتيجة شنو؟
القفل: الفوسفور بيمسك في الكالسيوم وبتحول لمركبات “حجرية” صعبة الذوبان، الجذور بتشوف الغذاء لكن ما بتقدر تلمسه .يعني بالبلدي كدا النبات ما بقدر يمتص الداب من الأرض ولا يستفيد منه.
حرق الجذور: الداب بيطلع غاز أمونيا ممكن يأذي جذور الشتلات الصغيرة ويضعفها من البداية.
البديل (روشتتنا):
اولاً استعمل “السوبر فوسفات الأحادي”.
لأنو فيهو “كبريت وكالسيوم” (جبس)، بيغذي النبات وبقوي أنسجته وما بيرفع القلوية حول الجذر.
نصيحة: أدفن الفوسفور مع التجهيز قريب من منطقة الجذور، الفوسفور “كسلان” ما بيتحرك، لازم توديهو لحدي فم الجذر.
ثانيا: حمض الفوسفوريك.. الحل السحري مع ماء الري
عارف إنو قلوية الأرض الزائدة والمياه المالحة بترسب العناصر الغذائية؟
هنا بيجي دور حمض الفوسفوريك، مادة بنضيفها لماء الري عشان تحسن جودته وتقلل القلوية العالية. الحمض ده بيساعد في إبقاء العناصر ذائبة وجاهزة للامتصاص، وبيقلل “البيكربونات” اللي بترفع قلوية التربة بمرور الوقت.
نتائج حمض الفسفوريك جبارة من ناحية تسريع النمو وزيادة الإنتاجية .
تحذير هام جداً: حمض الفسفوريك مادة لازم تتعامل معاها بحذر وما تستخدمها عشوائياً بدون استشارة مختصين والالتزام بالجرعة.
2️⃣ ليه “اليوريا” بتضيع قروشك في الهوا؟
اليوريا في جونا الحار وأرضنا القلوية، لو رميتها فوق الوش ونمت عليها، نصها بيطير في الهوا “غاز”. إنت دافع قروشك في سماد للنبات، ما عشان تعطر بيهو الجو!
البديل (روشتتنا): استعمل “سلفات الأمونيوم”.
دي “مُحمّضة” للتربة، بتكسر القلوية حول الجذر وتفتح “الأبواب المقفولة” للعناصر التانية.
نصيحة: لا ترمي السماد دفعة واحدة. النبات زينا، بيحتاج وجبات صغيرة (دفعات). وأهم شي: أدفن أو اسقي طوالي بعد التسميد عشان تضمن إنو الغذاء نزل للجذور.
3️⃣ العناصر الصغرى.. “مفاتيح” البركة
بتشوف زرعك مصفر رغم إنك كبيت يوريا؟ أو الزهور بتقع؟
الحديد، الزنك، والمنجنيز.. دي عناصر بنحتاج منها كميات بسيطة لكنها هي “المفاتيح” اللي بتشغل مصنع الغذاء. في الأرض القلوية، العناصر دي بتكون “مسجونة”.
الروشتة: لازم تعوض النبات بعناصر صغرى (رشة أو مع السقي)، لأنها هي اللي بتخلي النبات يعقد ويقاوم الأمراض.
الخلاصة.. جرب وما بتخسر:
يا مزارعنا، نحنا ما بنقول ليك كلام نظري، ده علم المراجع الدولية وتجارب الشركات الكبيرة.
فدان واحد بس: ازرعوا بـ (سوبر فوسفات + ( حمض فسفوريك )+ سلفات أمونيوم + عناصر صغرى).
باقي أرضك: واصل فيها بنظامك القديم (داب ويوريا).
إذا لقيت الفرق في طول العود، وقوة الورقة، ووزن الحصاد.. تعال واصل معانا وطور زراعتك. وإذا ما لقيت فرق، ارجع لقديمك وما خسران شي.
الزراعة فهم وعلم.. وأبو كشوة دايماً معاك لإنتاجية تشرف.
في طريقة بسيطة ممكن تخليك تشوف الفرق بعينك في نفس الموسم لو عايز تجرب الطريقة دي… اكتب (عايز أجرب)
الكلام الفوق ده مجرد “قطرة من بحر” ومعلومات بسيطة من ملف التسميد اللي بنناقشه بالتفصيل في (ورشة الطماطم) مع أبوكشوة . الورشة دي فيها “الزيت” والحلول العملية لكل المشاكل البتقابلكم في الميدان، ومن مراجع علمية عالمية ومجربة.
فرصتك الأخيرة:
التسجيل للورشة شارف على الانتهاء، وخلال 48 ساعة فقط حيقفل باب التسجيل نهائياً.
ما تفوّت على نفسك الفرصة دي عشان تبدأ موسمك بوعي وعلم، وتغير حال أرضك للافضل.
للتسجيل والاستفسار:
[اتواصل معانا واتساب 0128136196
او اضغط في الرابط الواتساب مباشرة
https://wa.me/message/JNQIPAXGKF3YJ1]
إرسال تعليق