بقلم / الدكتورة رناد ابو كشوة
“مدير مركز ابو كشوة لتطوير الزراعة”
أحياناً بمر بلحظات بحس فيها بالتعب…
والتركيز بكون هارب مني…
وبشعر إنه “رناد” دي خلاص ما قادرة تدي أكتر.
لكن في اللحظة دي…
بعمل حاجة واحدة:
بطلع من ضيق نفسي…
لسعة الرسالة.
ببطل أفكر في تعبي…
وفي صورتي…
وفي أنا.
وببدأ أشوف الناس.
بتخيل المزارع…
القاعد هسي في أطراف الجزيرة… أو الشمالية… أو الغرب
راجع من يوم طويل…
تعبان… ساكت…
لكن ماسك تلفونو…
ومستني.
الزول دا ما اسم في كشف.
دا إنسان شايل:
مصروف بيت
تعليم أولادو
تعب سنين
وأمل بسيط إنو المرة دي تختلف
حط كل دا في كفة…
وفي الكفة التانية:
كلمة واحدة صح… ممكن تغير النتيجة
بشوف المزارع المتوجس…
اللي خسر الموسم الفات
وبقى يخاف من أي ورقة تصفر
ما داير كلام كتير…
داير يفهم.
وبشوف الشاب…
الراهن بكل شيء عشان يثبت إنو الزراعة علم
واقف على كلمة…
مستني أساس يقيف عليه
وبشوف الأرض…
الأرض التعبت من العشوائية
ومن الاجتهاد بدون فهم
الأرض المستعدة تدي…
لو لقَت زول يفهمها
في اللحظة دي…
صوت تعبي بهدأ
وصوت احتياجهم بعلو
وبتذكر الحقيقة:
أنا مجرد جسر
وكله على الله
أنا مجرد سبب
ربنا اختارني أفتح باب…
وأوري طريق
وفجأة…
الملفات القديمة
ما بتكون تقيلة
بتكون:
روشتات
مفاتيح
بدايات جديدة
هم ما محتاجين رناد تكون كاملة
هم محتاجين رناد تكون:
موجودة… بصدقها… وبأمانتها
ومن هنا…
برجع أبدأ
مش عشان أنا…
لكن عشان الأمانة
د.رناد أبوكشوة
إرسال تعليق