النسوية ليست مشروع لاستبدال هيمنة الرجال بهيمنة النساء

صباح الخير|| د. تماضر محمد الحسن

“إختصاص الطب النفس”

جاني كم صوت لوم من سيدات بفتكروا انو انا بعدم اتفاقي مع قروبات بتنشر صور رجال لفضيحتهم او حتى لمعرفة اذا عندهم علاقات تانية دا فيه عدم دعم للسيدات .. وبخلي الرجال يفلتوا من انهم يتعرفوا ..

حابة بس اكتب الكلام دا وبوضوح جدا …
اولا انا ..
اتولدت في بيت كله نسوان
انا عندي اربعة اخوات …
امي مره واقفة عديل زي الرقم واحد …
خالتي الله يرحمها الساهمت مع امي في تعليمنا وتنشئتنا كانت مره بديعة ومختلفة …
منحدرين من قبيلة المره كلمتها سيف ورايها مسموع … رجالنا من ابهات لاخوان لخيلان لاعمام كلهم داعمين ومحبين
ما في شيء بتم والا احنا في نصه .. كتف بكتف معاهم ..
مرحبين ومحبين ومضللين علينا بجناح المودة والاحترام ..
(دقيقة خلو النسوان يجوا )
كنت بسمعها وكتير جدا عندنا لكن فيها قيمة شديدة وما فيها منقصة
خلى كلمة مره ولا نسوان كلمة عادية ماعندي عليها ماخذ ولا اعتراض

قمنت بينهن .. شفت مقدراتهن وامكانياتهن … ومعرفتهن ..
من انا طفلة اي حتة فيها نسوان بكون قاعدة
البجونا يزورنا انا وناستهن
الكرامة البعملوها الشفع تحت الشجر اعدادا للبنات عشان يكونن كريمات وبعرفن يطبخن انا زولتها

رقيص العروس من التعليمة انتهاءا بالعرض الختامي اول زول بقعد في السباتا وبصفق وبغني وبرقص ..

الجمعيات الادبية .. اتخادات المدارس … الجامعات والمنظمات الحقوقية مرورا بالاجسام البتقيف للسيدات وبتدعمهن .. حتى التخصص الانا اخترته كطبيبة جزء منه وظفته لصحتهن ودعمهن ..

كبرت وانا عارفة قيمة نفسي وعارفة قيمة النسوان .. امنت بينا امي فامنت انا بنون النسوة …

ويمكن عشان بريدهن وبريد قعادهن وونستهن … ومع العمر وزيادة الخبرة بقيت اعرفهن زي ما بعرف وشوش بناتي …
معصورة عليهن ومهتمة لشانهن
وكلما كنت صادق في المحبة …فالمحبة معدية
بقيت مصدر ثقة ليهن باختلاف تعليمهن … واعمارهن …ووجودهن في الحياة ..

لو كان في شيء واحد ممكن اكتبه انه ساهم في اذاهن هو نظام السلطة المجتمعي البدي الراجل حق الاذى دا … واي سلوك او اي مبرر مجتمعي سيء بيكون تحت الغطاء دا … اللهو سلطتهم وهيمنتهم علي النساء ..

دا السبب الخلاني اقيف واتكلم عن كتير من المواضيع العندها علاقة بالموضوع دا ..
ودا الخلاني احترم واقدر الفكر النسوي الاصلا قايمة على انه

النسوية ليست مشروع لاستبدال هيمنة الرجال بهيمنة النساء، بل لتفكيك نظام الهيمنة نفسه.

عشان كدة مستحيل ادعم اي تصرف بشبه التصرفات الاحنا مكتويين بيها وضدها … لانو ما حنكون حلينا شيء

ولا افتكر انحيازي للسيدات ودعمهن بخليني اثني ارتكابهن لنفس السوء المرتكب في حقهن … لانو دا مااصلاح … دا زيادة في وجودهن في الدرك الهن موجودات فيه …

اولا انا ضد انك تكون عايز تكون في علاقة مع شخص تسال منه الناس بالصورة الموجودة والمبتذلة حقت (ادوني زيته).. في الف والف طريقة ممكن تعرف بيها الواقف قدامك من غير ما تجي في ميديا تسال ناس ما بتعرفهم
دا فيه اهانة ليك كسيدة قبل ما تكوني بتهيني فيه هو كراجل …

وبوري انو احنا كسيدات محتاجين نعرف انو البيوت الحابين نقومها بتقوم بالاحترام والامان والثقة واللطف الهم كلهم كدة معدومين في علاقات دي بداياتها ..

انا تماضر ما بدعم اي سلوك ما قويم ولا اي نوع من انواع الاجرام بدعوى مناصرة نساء لانو السلوك دا سلوك اجرامي بحت ..

ولما كانوا في رجال بهددوا نسوان بنشر تفاصيل علاقات معاهم زمان بانهم برسلوا الكلام دا لاهلهم وبعد داك جات الميديا وبقى في رجال بهددوا نسوان او حتى فعلا بقوموا بعمل الموضوع دا لابتزاز النسوان ديل وتخويفهن. انا كنت بدعم اي واحدة يحصل ليها كدة وممكن ندفع للقانون عشان يتم محاسبة البقوم بالعمل الاجرامي الردئ … عشان كدة مستحيل اكون عايزة واحدة تعمل عمل لا اخلاقي زي دا في المقام الاول … واننا نعيد تدوير نفس النفايات الاحنا ضدها بنفس الاسلوب والطريقة .. الابتزاز جريمة سواء البقوم بيها دا راجل او مره ..
طيب نحل مشاكل نسوان تم التغرير بيهن ( وغشهن)…

بالوعي على المدى الطويل … الوعي الحقيقي بانها تعرف تختار بحصافة ومعرفة .. وحتى لو اكتشفت انو الشخص مخادع ومتلاعب بتتوقف وطوالي عن الاستمرار من معرفة
red flags
الاولى .. وانها تكون صاحبة قرار في الاستمرار من عدمه. .. قرار عن معرفة وليس عن ضعف ..

كيف تعرف تتجاوز وتستمر في طريقها وتعرف انو التجربة المرت بيها دي بتخليها اقوى. لقدام واكثر تبصرا في خياراتها ..

تعرف كيف تسال من الشخص الهي عايزة ترتبط بيه اذا في جانب ماكان واضح .. بس قبل دا يكون هدفها فعلا الاطمئنان علي نفسها هي مش زج الشخص دا في مواقف مامنها فائدة … مع انه الشخص البغلبك انك تعرفه انت لرقبتك صعب انو غيرك يوريك .. لانو غيرك ماواقف في مكانك ولانو انت المعني بالموضوع … وطالما لا بينكم صدق ومكاشفة ولا وضوح فدي علاقة مصيرها الفناء

الطريقة التانية للزولة التم التغرير بيها تعرف انو من حقها الشكوى والمقاضاة اذا الشخص دا اتسبب في اي شيء حصل ليها (من غير رضاها)

طالما انت قبلت ورضيت من البداية فالقانون لا يحمي المغفلين والمغفلات

واذا كان في نتيجة ايا كانت للعلاقة البين الاتنين ديل مثلا اطفال برضو من حقك مقاضاة الشخص والزامه بعياله وانفاقه عليهم ..

فيما عدا ذلك من انتقام وتعقب وابتزاز وغيره فدي سلوكيات سيئة وملانة اجرام … وعدم ثقة وعدم معرفة وعدم قيمة لنفسك قبل ما تحدث اي ضرر بالاخر الممكن فعلا يجعلك تدفع تمنها وبصورة قانونية

دعم النساء باي حال من الاحوال لا يعنى فساد المجتمعات ولا جر هذة المجتمعات لمنحدر اسوا من الهي واقفة فيه …

دعم السيدات مسؤولية

دمتم طيبين
تماضر

تمر الرضا