تحت وطأة سندان الحرب ومطرقة الفقر والعوز وانسداد الافق

  • بتاريخ : 19 نوفمبر، 2026 - 11:29 م
  • الزيارات : 2
  • مساء الخيرات || د. تماضر الحسن

    “اختصاصي الطب النفس”

    حابة بس اطمئن انو الحفلة الحالية انتهت ولا فيها عقاب شوية !!!!
    والتانية متين باذن الله عشان الزول يجي (مردف) …
    دا والله قمة البؤس
    وقلة الحيلة والهوان …
    بلد ممزق .. انسانه يعاني الامرين
    تحت وطأة سندان الحرب ومطرقة الفقر والعوز وانسداد الافق..

    الموت الصعب الكعب
    بقى عادي ..
    الحياة بقت جهنم
    صعبة وعسيرة وتحدياتها كتيرة

    والناس للاسف بتعمل نوع من انواع الدفاع النفسي اقرب للازاحة
    displacement

    لعجزهم على تحريك اطرافهم بصبوا جل غضبهم علي البفتكروا انهم (سعداء ) ومبسوطين ونايمين علي ريش نعام …

    عدم مقدرتهم علي انهم يعملوا شيء لروحهم بجتهدوا في جر البفتكروه واقف علي حيله ارضا معاهم ..
    زي الزول الغرقان البلقاه قدامه بجروا معاه تحت ..

    انا على فكرة مقدرة المسالة دي … ومتعاطفة مع حالة (التكتيف) العند ناس كتار مخلياهم في حالة تخبط وضياع وزعل وغضب

    لكن للاسف حتى الوسيلة الهم بعملوا فيها ما بتوصل لحتة ..
    وما بتبلغهم اي مكان
    وما بتحل مشاكلهم ..

    وحابة بس اقول لو سمحتوا لي (هنا في حيطتي دي )
    لو تكرمتوا يعني

    انو انا تماضر الواقفة قدامكم هنا في هذا الاسفير
    المحبة والقبول والتقدير دا ما حاصل لي عشان انا طبيب

    انا صادف اني اكون طبيب بس
    لانو اكتشفت انو (حملات الدفتردار الانتقامية دي ) وقودها بعض الاطباء والطبيبات الزملاء والزميلات اصحاب المنافسة اللامبررة والغيط المامفهوم اسبابه .. ويمكن لانهم بخافوا من المواجهة ومن مغبات سلوك زي دا
    بتدسوا ورا المابكون عنده شيء يخسره ..

    حابه اقول ليكم
    الموقع حقي الحالي
    ماعندو علاقة بالطب شديد .. لو دا بريحكم

    وانا في احيان كتيرة بتكلم في حاجات ما طبية وبتناول قضايا انا صاحبة الراي فيها ويمكن ساعدتني (ساعدني بس ) قصة انو انا طبيبة امراض نفسية واهتمامي بعلم النفس السلوكي التربوي في انو اصيغ الكلام بطريقة كويسة ادت الغرض من انها تتقال او تتكتب … لانو في اطباء نفسيين كتار قديرين وكويسين ماعندهم علاقة بالانا بكتبه او بقوله ..

    انا معروفة. لسبب واحد بس ..
    لانو انا اخترت اكون(مع الناس)
    اخترت ادي زمن للبحتاجني .. وخليت الرسالة دي من اهدافي في الحياة واخلصت فيها النية
    ولسنوات وسنوات ..
    لحدي ما وصلت الحتة الاسي مولعة النيران دي في بعض خلق الله ..

    يعني القصة دي ماوليدة صدفة
    وان ليس للانسان الا ما سعى ..
    وما حصلت بين يوم وليلة
    دا زمن طويل

    الناس الحولنا ديل ما بتغشوا وما تفتكر انك احسن منهم
    بقروا كويس وبعرفوا كويس والاهم انهم بميزوا كويس ..

    انتو كاطباء ماشوية ومامقصرين في الانتو اخترتوه في حياتكم .. لانو في اطباء عندهم شهادات احسن
    وبراسوا مؤسسات وبشتغلوا في حتات مهمة .. عندهم انحازات عظيمة
    الناس ما بتعرفهم لانهم ماعندهم علاقة بالناس او علاقتهم مع المعاهم في شغلهم وعندهم نفس الانتريست ..

    انا بقى مختلفة
    انا بشتغل في الجاليات والجمعيات والنقابات
    بحب الاعمال الطوعية
    وبسافر
    وبلاقي الجماهير وبلتحم معاهم

    بمشي البازارات … والمعارض .. والايام المفتوحة
    بشتغل ندوات .. سمنارات ..
    بحضر الحفلات
    بغني وبرقص وببتهج ..

    بتفن في الواطة
    وبتكلم لغتهم
    وبلبس زيهم ….
    الطب دا مجرد مهنة انا باكل منها عيش … بس عمرها ما كانت سبب في انها تخلق الزول المحسود علي محبة الناس دي …

    للجماهير الغاضبة دي ..

    انا ما سبب الحرب
    ولا موت الناس
    ولا المجاعة الكتلت الناس ولا الامراض المتفشية

    ماتخلو الفيل وضله والحاصل ..وتطعنوا في شيء ما بسبب ليكم في اي اشكال يخصكم …

    اجدد العهد اني موجودة وباقية الى ان يرث للله الارض ومن عليها. .
    ومن هذا (البنبر)
    حابة اشكر حبان قساي
    من وقف خلف ظهري
    من رفع ايديه يقيني شر هذا النهار الغائظ ..
    من خلع جاكيته والادتني شال محبتها
    من ربتوا علي كتفي
    من احتضننوني وقبلوني ودثروني
    واقاموا جدار روحي خوفا عليه ان ينقض

    القالوا لي (معليش)

    بحبوني وبدلعوني وبحنوا علي .. وبتمنوا لي الرضا ارضى وانا كذلك ..

    اهل محبتي
    وانا يملكني من يحبني ..

    انا اميرة بالمحبة دي
    وانا ملكة بالمشاعر
    وانا كبيرة بالدعم دا
    وانا حلوة بالالتفاف دا
    وانا مفيدة باعترافكم واحترامكم دا
    وانا مبروكة ومحظوظة بالقبول الكبير دا

    انا تماضر مشمولة بالمحبة وبالاحماع الكببر دا

    القبول دا شيء الهي ..
    زيه وزي الرزق .. والشكل والشطارة والفلاحة وعرفة الكلام … والقدرة علي التاثير ..

    عطيه من ربنا مافي زول بتعلمها …

    والبديك ليه رب العباد مافي زول بقلعه

    تماضر
    تمر الرضا