نحن الان عزيزي القائ نقف عند محطه. هامه. وتاريخ مضيئ من عمر اعلامنا السوداني بصفه عامه. وتلفزيون السودان. علي وجه الخصوص .انه احد اعمده الاعلام ببلادنا واحد العظماء الذين جلسوا علي مقاعد الاداره بتلفزيون السودان في عصره الذهبي.وواحد من اروع واميز الاداريين ومقدمي البرامج في ذياك الزمان الجميل واحد الذين صنعوا الجمال. كل الجمال علي شاشه القومي من لدن فرسان في الميدان تحت الاضواء. امسيات. لقطات جراب الحاوي الكون ذلك المجهول مع النجوم وليس انتهاءا باسماء في حياتنا استاذ ومعلم. مفكر ومبتكر محاضر مدرب صانع محتوي. بدرجه الامتياز جمعت لديه كل المواهب في شتي ضروب الفن والابداع والاعلام انه وكما يقول هو واحد منا تجدني عزيزي القارئ احس بالسعاده والفخر وانا احاول مجرد محاوله ان القي بعض الضوء علي شخصيته الاكاديميه والعلميه والرياضيه والاعلاميه والفنيه والاداريه. انه استاذ الاجيال الدكتور علي الريح الصديق يحدثني قائلا يايسريه. دكتور دي في الجامعه. ايوه. في الاكاديميات. ايوه لكن. في الحياه العامه دي ياخ مافي كلام زي ده مابتضيف ليك ولابتخصم منك ! (( اعرف البعض ان لم تنادي اسمه مقرونا بحرف الدال. يخاصمك )) ! يالتواضعك الفريد وجميل ياعلي ! تقلد منصب مدير البرامج بالتلفزيون في عهد الفطاحله حمدي بدر الدين والباشمهندس حسن احمد عبد الرحمن فكانت الخارطه البرامجيه الاروع والاجمل والابهي والانضر فرسان الابداع (( ناس حمدي بدر الدين ومتوكل كمال وفريد عبد الوهاب وحساس محمد حساس ( محمد عبد الله الريح ) محمد سليمان بشير دنيا دبنقا دردقي بشيش تحت الاضواء وحمدي بولاد الفكي عبد الرحمن شانتير المحامي وقضايا قانونيه د. ابو عبيده المجذوب وبرنامج صحتك وهلم جرا لايكل ابدا ولايمل كالنحله هو من مكتب الي استوديو الي السواقين مرورا بمكتب الفنيين والمخرجين والمهندسين الخ. ميدااااني لاتجده يجلس علي مكتبه ابدا (( تدوخ السبع دوخات عشان تلقاهو ))! ياسلااام فتره من اجمل وابهي السنوات التي قضيناها مزاملين لهذا المبدع الخلاق ….. الساعه الثالثه من بعد الظهر عربات الترحيل تكدس بها العاملون امبده بحري الثوره الصحافه مدينه النيل الخ ..صوت يناديني بشده التفت لاجده الاستاذ ترجلت من العربه بعد ان طلبت من السائق الانتظار……. اسمعي. خلي الناس ديل يمشوا نحن الليله مقدم السهره اعتذر لظرف طارئ ( سهره علي الهواء مباشره )! داير امشي البيت بالليل الساعه عشره اشوف سهره ممتعه وهادفه من اعدادك وتقديمك. وامشي تلقي المخرج صالح مطر قاعد في مكتبوا. كلمتوا. حيخرج ليك السهره . انتهي !! (( شوف عزيزي القارئ كيف يصنع هؤلاء الفطاحله الاول النجوم )) ! كانت رحله بحث دقيقه وصعبه ومضنيه في مكتبه التلفزيون بين عشرات الالاف من الاشرطه وانتهت السهره بسلام .صبيحه اليوم التالي كان حافزا فوريا لكل فريق العمل .الاستاذ الدكتور علي الريح عرفته قاعات الجامعات ومدرجاتها استاذ مشارك ومحاضر بالعديد من الجامعات بالسودان مديرا لاكاديميه علوم الاتصال لمده خمس سنوات تخرج علي يديه اجيال عمروا فضائيات السودان والعالم من حولنا .السنوات الطوال التي عمل بها بالتلفزيون القومي كانت الاروع علي الاطلاق اذ استمتع فيها المشاهدون ببرامج من ذهب ولقاءات فنيه نادره مازال التلفزيون الي الان لم يسجل مثلها ابدا
كان الاستاذ علي الريح ذاهبا الي الخرطوم في مهمه تتعلق بالعمل وكان الوقت صباحا فاذا به امام نادي الفنانين بامدرمان يستمع يري جمهره مواطنيين علي السور الخارجي للدار وصوت الفنان العبقري وردي ينطلق من الداخل
اذن هي بروفه لاحدي اغنيات الامبراطور سرها علي في نفسه وركن سيارته وترجل منها داخلا الي صاله البروفات بالدار واقفا خلف الجميع يستمع .ابصره الامبراطور ومن فوره اوقف البروفه مناديا عليه
ياعلي الريح. الجابك هنا شنوو؟
والله جيت ماري ماشي الخرطوم سمعت دندنه عود وردي المابغباني ركنت عربيتي. وجيت اسمع. لاني من معجبي وردي!
تعال يا علي. تعال انا دايرك
ودار بينهما هذا الحديث
وكت انت من معجبيني. ياخ انا عندي غنا جديد كتير داير اسجلوا. في التلفزيون حتي القديم برضو لانو ماعندي عنكم تسجيلات كتيره الا القليل مع متوكل كمال في برنامج امسيات واخرين قلائل
بس يا محمد ياخ انت عارف ميزانيه التلفزيون ماابتسمح باجرك العالي ده. ماعندنا قروش
ياعلي ياخ انا متنازل عن حقي المادي للتلفزيون. بغني ليكم مجاني لكن عندي شرط
شوالله تغني لينا مجاني ده كلام جميل اها قول شرطك شنو
شرطي تفضوا لي استوديو علي شمو من الصباح لحدي المساء لمده اسبوع
كلام حلوو. خليني ارجع لمدير التلفزيون اكلموو. وبفيدك
انتهت البروفات وودع علي وردي وانصرف بالطبع لم ينس اللقاء الثمين والحيكون خبطه رااائعه ومكسب كبير للتلفزيون ومكتبته وللجماهير السودانيه عاشقه اغنيات الامبراطور قابل الاستاذ. مدير التلفزيون وقتها عباس عبد الله المنتدب حينها من وزاره التربيه والتعليم والذي وافق علي الفور مبتدرا علي الريح بسؤاله لكن ياعلي انت بتقدر توفر الاستوديو المده دي كلها. ايوه بقدر ياعباس خليها علي اصلا كنا بنسجل البرامج الدينيه ودي بوديها استوديو الاخبار مافي مشكله .تمام. علي بركه الله ده مكسب لينا كبير اتصل علي بوردي وحدد له الايام سر جدا الامبراطور وكان يوم كذا صباحا الموعد
تاخر وردي عن العاشره صباحا التي ضربها موعدا لحضوره الي مباني التلفزيون. وعلي الريح والطاقم الفني باكمله في الانتظار بقياده المخرج الكبير عصام الدين الصائغ .الساعه الثانيه عشره ظهرا (( الجوع حاصر علي والمجموعه الفنيه )) ذهابا الي بوفيه التلفزيون (( طبعا هم موظفون. يعني الفلس حاصل )) طلبوا قرع عسلي بالكسره. وبشهيه كبيره بدأوا في تناول الفطور والغداء فاذا بالفنان الكبير وردي يحضر بكامل فرقته الموسيقيه و(( حقائب الملابس الخاصه به للتسجيل )) اين علي الريح ؟ هناك بالبوفيه. وقف علي الطاوله ينظر !!
سلام ياجماعه. اهلا يا دكتور. اتفضل
اتفضل شنو؟؟ اتفضل اكل معانا قرع بالكسره
كسره شنوو وقرع شنوو ! انتو حتشتغلوا مع وردي تاكلوا. قرع ؟
اسمع ياعلي انتو كم
نحن سبعتاشر
نادي وردي علي مدير اعماله امشي الفندق الكبير جيب تمنتاشر غدا للجماعه ديل ..
نواصل …..
إرسال تعليق