بقلم/ الدكتورة تماضر الحسن
“اختصاصي الأمراض النفسية والعصبية”
صباح الخير …
زمان لما كان في سوق سعد قشرة … التاجر عشان يبيع حاجاته بنادي للبنات
تعالي يا دكتورة
تعالي اتفرجي علي الحاجات دي با دكتورة
السعر دا عشانك يا دكتورة
انا ليوم الليلة مافهمت ليه كانوا بقولوا ليهم كدة .. وليه الواحدة كانت بتبتسم وترجع تتكلم مع سيد المحل
البحيرني
عرفت كيف انها المعنية بالمناداة دي في حال انها مادكتورة
حتى بتكون ما صححت ليه المعلومة
لانو مامعقول سوق كامل الفيه ديل كلهم دكتورات .. والتاجر عرف المعلومة دي كيف ..
اسي مافي سوق سعد قشرة
اسي في سوق سوشيال ميديا
الكل فيه دكتور ودكتورة
الكل مقدم نفسه بالطريقة دي ومافي واحد بقيف عشان يصحح للناس انه ما صاحب (الدال) يعني
الدكتور عندنا ما البحمل شهادة دكتوراة
الدكتور طوالي عندنا هو الطبيب …
قبل ما نناقش السلوك الفردي … احنا كثقافة مجتمع ليه بنتعامل مع حرف الدال قبل اضافته للاسم كانه صاحبه مميز وعظيم وخطير !!!!
وليه بنفتكر لو قلنا لزول يا دكتور بكون (كتلنا قلبه) وخليناه يقيف يسمعنا وهو مبسوط !!!
يمكن زمان اظن عشان الطب دا صعب الناس تقراه وكان عددهم شوية
اسي ورا كل لفة في كلية طب والدكاترة عددهم كبير ومافي شيء مميز ولا شيء ….
السلوك الفردي انو مرتادي سوق السوشيال ميديا بصروا علي قصة انهم دكاترة دي بصورة غريبة وما بصححوا الحاجة دي …
لو في زول من المتابعين حاول يصحح الباقين بانه الزول دا ما طبيب ولا شيء وممكن يكون خريج كلية بتشتغل مع الاطباء في تقديم خدمة صحية او جزء من العملية العلاجية للناس الشخصية بتزعل وبعض المتابعين القروا نفس مجالها برضو بزعلوا
مع انها دي الحقيقة ..
لا القرا اشعة دكتور
ولا القرا تخدير دكتور
ولا خريج المعامل والمختبرات الطبية دكتور
ولا خريج علم النفس دكتور
ولا القرا علاج طبيعي دكتور
ولا ناس الاعشاب والطب البديل دكاترة
ولا ناس التغذية دكاترة
ولا ناس التجميل من غير الاطباء دكاترة
ولا البصير دكتور
ولا ناس المساج اطباء
مالم يكون محضر دكتوراة في المجالات دي ببقى حامل درجة دكتوراة لكن ما طبيب برضو
التصنيف دا مهم لمصلحة الناس وعشان يعرفوا المعلومة جاية من وين عشان البقدمها دا يحاسب … والبقدم الخدمة يتحاسب علي حسب الجهة البنتمى ليها
البني ادم دا مهم … صحته مهمة … اي شيء يخصه النعامل معاه مغروض بكون واضح ومحدد والبتعامل معاك مفروض يكون بيحمل المؤهل العلمي والوظيفي والخبرة البتديه الحق في تقديم الخدمة دي خاصة البتقاضى عليها اجر…
..
و مافي شرف ولا عظمة في التصنيف دا … في وظايف كدة عندها مسؤولية مجتمعية واخلاقية وقانونية
منهم الاطباء ديل ..
و لما تتكلم عن صحة الناس والسلوكيات المرتبطة بالصحة دي انت كطبيب دورك مهم …و لانو كلام الطبيب مفروض يكون مختلف عن كلام العامة وبالذات لما يدي نصايح عندها تاثيرها علي سلامة الناس النفسية والجسدية
مافي طبيب بقدر يدي نصيحة او يرسل رسايل ذات محتوى طبي يكون فيها تعارض مع كتب الطب المعتمدة في تعامل الناس مع امراضهم اسبابها والتداوي منها والسلوكيات المرتبطة بيها .. حتى لو مبنية علي تجربته الشخصية .. التجربة الشخصية بختاج لابحاث واثباتات عشان تكون معتمدة
الطبيب ماعندو الحق يبتدع حاجة ماموجودة او ما مثبتة علميا .. لو حاول يعمل كدة اي دولة محترمة وعندها مجلس بنظم عمل الاطباء بتم ايقافه ومعاقبته لانو مفروض انو اي طبيب يكون مصدر لمعلومة صحيحة وعلمية ومثبته
ماكدة وبس
في دول العالم الاول … الفيها المهنة عندها محددات وتاثير علي المجتمعات
الاطباء مامسموح ليهم بانهم يقولوا اي كلام او اي تعليق بعمق من العنصرية ايا كان نوعها … سواء عرقية او دينية او جنسية
اي سلوك يدعو للموت والدمار ..
و اي خطاب فيه حث علي سلوكيات مجتمعية ضارة بالناس ..
سلوك الطبيب وتعامله وكلامه عن زملاءه او تعاطيه معاهم في السوشيال ميديا ممكن يتم مساءلته قانونيا اذا كان شخص متعدي ومسيء
حتى سلوكك مع الناس العادي والفاظك البتستعملها تكون منضبطة وكويسة
هنا عادي الناس العاديين برسلوا للجهة المخدمة او المجلس المسجلك ويشتكوك اذا لقوك بس عامل استحسان لكلام مسيء او قبيح او عنصري
ما مفروض الطبيب يكون حزء من كلامه. الطبي كويس وعلمى وصحيح علميا وصحيا. وجزء من كلامه بمزاجه وحسب شوفه لانه دا بعمل نوع من الارتباك لدى المتلقي .. وحكاية انا بسمع فلان الفلاني. لما يتكلم عن معلومات طبية مثبته وباخد منه الكويس وبخلي الباقي
انت كزول عادي وقاعد عشان تفهم البحصل قدامك
عرفت كيف انو دا الصاح ودا الغلط !!!!
الطبيب سلوك وطريقة كلام و مهنية في كل شيء قبل ما يبقى مصدر لمعلومة … حتى البوست الانا كاتباه دا محاسبة كطبيب علي الوارد فيه
د.تماضر الحسن
إرسال تعليق