بقلم / رناد أبو كشوة
“طبية أسنان- مديرة مركز ابوكشوة لتطوير الزراعة”
تطلب مني 26 سنة عشان اتعلم الدرس دا
في ناس بتدخل معاهم في نقاشات مطولة، وفجأة تكتشف إنك في معركة، والمطلوب منك تطلع خسران مهما كنت صاحب حق.
مرت عليك اللحظة دي قبل كده؟ اللحظة الشرح فيها بيبقى خسارة، وتوضيح الأذى بيبقى استنزاف ما عنده أي معنى..
في ناس خسارة فيهم الكلام أو حتى انك توضح ليهم انو تصرفهم دا مؤذي بالنسبة ليك ما حيفهمو ولا حيستوعبو كل البهمهم كيف يقلبو عليك الطربيزة و يغلبوك ويكونو هم الفايزين كأنكم بتعلبو لعبة والفائز عنده جائزة.
في ناس وجودهم في حياتك بأخرك بجرك لتحت وانت محتاج اي دقيقة و اي ذرة طاقة عشان تواصل طريقك. في الزمن دا الاستنزاف بقى ساهل و خسارة الطاقات بتأخرك.
عشان كده، في خطوة إستراتيجية صامتة لو عملتها الليلة، حياتك وخططك حتتغير 180 درجة، وحتقدر تحمي أحلامك من غير ما تخسر ذرة طاقة واحدة في مكان غلط.. الخطوة دي ببساطة هي:
زي ما في تطبيقات بتكون شغالة في خلفية التلفون و بتستهلك البطارية بدون ما تحس و اول ما تشغل وضعية حفظ الطاقة البطارية بتقعد اكتر و بتقدر تستفيد من تلفونك لحد ما تلقى مكان تشحنه فيه تاني
بنفس المستوى شغل وضعية حفظ الطاقة و اقفل كل المستنزفات الشغالة في الخلفية عشان تقدر تركز على أهدافك احلامك.
واهم حاجة ما تاخدو بالكلام ما تقولو فلان كويس لأنه قال لي و تجو تقولو اتخذلنا. الخذلان بجي من تصديق الأقوال فقط بدون ما تبني على أفعال. خلي الناس تتكلم وتتكلم زي ما هي عايزة قراراتك تبنيها على الأفعال الصادرة منهم، وبالفعل بوريك إذا هو كويس أو كعب. و تتوقع في الزمن دا بعد الفعل الكويس ممكن يصدر الفعل السيء
واذا بهتوك أو رموك بالاكاذيب و افتروا عليك ما تضيع زمنك في التبرير وإثبات انك صح بالكلام
الطريقة الصحيحة الوحيدة انك تصمت و تصبر و تثبت حقيقتك بالافعال و الأدلة العملية فقط
دي كلها حصانات عشان تبعد عن الخذلان والخسارة
ما بالضرورة انها تكون علاقات شخصية و بس
دي قوانين لكل أشكال العلاقات في الحياة بالذات في سوق العمل
د.رناد أبوكشوة
إرسال تعليق