شعر/ العليش الطريفي محمد
لملمت اطرافى
ومشيت فى سكة
الوهم الكبير
وحملت هم الزاد
معاى فى زحمة
الشغل الكتير
ولبست توب الامنيات
استرنا يا ربى الخبير
شاشيت وما خليت
دريب امشيبو
شان عدل المسير
وفترت خطاى
من المشى
حنى الكريعات
ما بتسير …
فكرت فى زحمة خطاى
ياربى سهل لى المسير
وبقيت افكر فى الوطن
العمرو ما لاقى النصير
وبقيت افكر فى الشباب
مستقبل العمر النضير
وبقيت افكر وكلى هم
يا رب وطننا
متين أصير..
وطنا يعز شعبو
لمن اتجهل المصير
وطنا كرامتو قيم
وطنا مستف..كلو خير
وطن رسم لوحة هواى
جوه فى الروح والضمير
وطنا ترابو زين
ونيلو بالخيرات وفير
وطنا شموخا وكبرياء
وطنا عزيزا لا يضير
وطن المحبه والسلام
وطن العدالة والنصير
وطنا جبالو دهب عديل
وطنا مجرتك بالقيم
والطيبه والخلق الجميل
وطنا يربى الجاي غريب
وطنا كريما وجد أصيل
وطن البشاشه والكرم
وطنا مياهو السلسبيل
وطن اجيالا صمود
وطن عزه وخليل
وطن نعزك يا وطن
انت البشاره والدليل
وطن ثبت مسامير الشعر
والقافيه واوازن الخليل
فيه القدنه والروب والسعن
فيه السمن والعسل والدهن
فيه الفول والقمح والدخن
فيه السمسم واللوبا القطن
فيه رجال
متاريس للمحن
فيه بنات عفافن ما ارتهن
فيه شباب على العمل امتهن
فيه مقامات الرجال
اعلام وساسه مفكرين
ما لانوا فى يوم للوهن
فيه ايات من جمال
الحسن والخلق الفطن
فيه الربابه والدليب
والعندليب لمن رطن
فيه مردوم الغرب
فيه طمبور الشمال
وشوتالنا فى
اقصى الشرق
فيه الجنوب الانفصل
يا دوبو مارق من حرب
فيه البطانه والسهول
والنيل يدافر منشرق
فيه النخيل شايل البلح
بركاوى وبرحى ومشرق
فيه الكرم باين عديل
فى الباديه والريف
قد غرق .
وطن الجمال الما خمج
وطن البطانه ام هبج
وطن العرب وطن العنج
وطن الزنوج وطن الهمج
وطن الحضارات من قديم
وطن التواريخ فى المهج
وطن وردى
الرسم عز النضال
بى اغنياتو الما خمج
وطنا رسم كل الملامح
فى نضال شعبا سمج
لكن ..اه … اه ….اه
اتعثر الخطوات عوج
لكن ….اه لكن …اه
اتعثر الخطوات عوج
ابنوهو بى همة شباب
ابنوهو بى حكمة شياب
ابنوهو بى فكرا مزج
وطنا بشابى على السماء
وطنا ترابو طين لزج
ابنوهو بسواعد الشباب
حتى الشباب
فى الحين زهج…..
شايل هموم كل الوطن
ابنوهو بس…
سيبوا الحرب
سيبوا الخمج …..!
العليش الطريفى محمد
شندي
الأربعاء الموافق ٢٠٢١/٠٧/١٤م
إرسال تعليق