بقلم/ د. تماضر محمد الحسن
“اختصاصي الأمراض النفسية والعصبية”
انا عندي معزة شديدة للصحبات
صحباتي هم وسادتي وعكازي وسندي
الحضن البجري عليه من الدنيا
جعل الله اجمل رزقي فيهن والحمدلله
وشاءت الاقدار انه دايما هن ناجحات وفالحات ومنتصرات واقفات
بعملن حاجات انا كل مره بكون مبهورة بيها
متقدمات زي الساعة
كل عقبة يقفزن فوقها كاحسن خيول السبق
سلمي الشفيع ..
البيني وبينها يمتد حبل سري مليء بالمباهج والجمال والعذوبة
بتعرفني حتى من غير مااتكلم
اها مالنا الليلة
وانا المتعودة اني اسمع
بتسمعني سلوم الخاتية اللوم
اللذيذة انها بتكون
devil advocate
ويتتحدي افكاري ومشاعري بحصافة شديدة ومعرفة تخصها هي براها
سلمي يا عينة الخريف .. كريمة واجوادة وفارسة وفي ايدها ماحقها
جابت كل اسرتها المكونة من اخواتها الاتنين البحبهم زي ماسلمى بتحبهم .. جابتهم بازواجهم ومعاهم زوجها واولادها… وجوني في العيد دا عشان يخلو طعم العيد براه
سلمى بقدر نجاحها في الحياة اختارت مهنة تشبهها وتشبه حلاوتها
عندها اجمل والطف واشيك كافيه في مانشستر بعمل البنكيك والجاتوهات والتورتات والايسكريمات واي نوع من انواع الكيك والمشروبات الساخنة والباردة …
second serving
مافي زول بعمل الحاجات دي زيها …
ومافي زول بعرف يرسم ابتسامة حلوة بغمازاتها الفاتنة وهو بقدم العمله مختوم بحلاوة روحها …
سلمي دا زول مخلوق من نسخة لا تتكرر … ومن عجينة بلا توار
اتفردت هي والعجين خلص
كل مرحلة في البيزنيس حقها بتحقق نجاح بحلاوة الهي بتقدمه
وانا في حالة ترقب اني اسمع نتيحة مبهرة دايما زي ما عودتني
الجمعة الجاية سلمى واقفة كالطود كراعي رسمي مع ميادة ودقشة عشان يعملوا حفل نسائي كبير في مانشستر يحييه الفنان الشاب محمد بشير …
وانا من خلف سلمي ومن خلف ميادة وزوجها محمد دقشة
خلف اي عمل اهله يزرعون فرح في شوارع ادمنت الحزن
وخلف كل من يود ان يرسم طريق يقوده الي نجاح
موفقة يا سلمي انت وشركائك وكل الرعاة والراعيات للمناسبة وكل شخص او جهة تحفر في طريق غير سهل للوصول لجمهور مترقب مستقبلا ان يكون مستهلكا ومستعملا لخدمات تمنح لهم …
الجمعة الجاية باذن الله معاكم في مانشستر
كل محبتي
تماضر
تمر الرضا
إرسال تعليق