بقلم /د.تماضر الحسن
(طبيبة نفسية، كاتبة)
مواصلة في الحديث عن الصمت العقابي
silence treatment
اكتر الاشخاص سوءا في الصمت العقابي
البكون بتونس وبضحك مع كل الناس قدامك
الكل بقول عنه انه عندو تواصل جيد وانه متحدث لبق وانه ظريف ولطيف ودمه خفيف ..
نفس الشخص صاحب المواصفات دي اول ما يشوفك انت قدامه وانت المفروض تكون اكتر البشر قربا ليهو وانو مفروض تكون اكتر زول مستمتع بالربنا وهبه ليه من طلاوة حديث ومجاملة وظرافة مجرد ما يشوفك قدامه تتغير سحنته .. بتوقف عن الحديث تتغير نغمة صوته وبتظهر شخصية تانية تماما غير البعرفوها الناس .. لدرجة انك ممكن تراجع روحك مية مرة كيف ممكن تكون الناس شايفاه لطيف وانت الوحيد الشايف النسخة التانية دي
في اشخاص اكتر سوءا في قصة الصمت العقابي
بتخيروا متين يتكلموا معاك ومتين يسكتوا منك
انهم حريصين علي (منظركم الاجتماعي ) قدام الناس و بكونوا مهووسين بانه كيف الببره ديل حيقيموا علاقتكم وضروري عندو انو تتوصفوا بانكم اكتر شركاء متفاهمين ومتجانسين ..
عشان كدة اذا طلعتوا مع بعض
قدام الناس بكون عادي معاك ويسالك من حاجات ويبتسم في وشك وبكون لطيف ومجامل
اول ماالناس تمشي يرجعك تاني في العلبة ويقفلك..
كانه بخت ميكاب قدام الناس وبمسحه اول ما الناس تمشي
احذروا الصمت العقابي .. فانه عدو الجمال في العلاقات ويورث الكثير من الحزن والسوء والوجع … الصمت العقابي مدمر
تماضر
تمر الرضا
اضافة..
سؤال انه هل هو بستمتع بالبعمله دا …
ايوة بستمتع جدا. …. وكل ماشاف المك وارتباكك وحزنك وضيقك كل ما دا خلاه سعيد اكتر بحصوله علي الارواء النرجسي حقو … استمتاع الاسد بضربه للفريسة بالارض ويخليه تفرفر وماياكلها .. النرجسي يعشق رؤية وجع القدامه وما بحس باي نوع من ازواع التعاطف بل بالعكس دا بخليه سعيد ومنتشي.
إرسال تعليق