بمناسبة الحرب الطلعت عينا دي
والناس بقت ساكنة سوا لاسباب كتيرة اولها ضيق ذات اليد .. والظروف والحال الحرن .. والجبر والغصب
وماتمليه تداعيات الحياة الشكلها ماشة على نقاص دي ..
انا من زمان كنت بستغرب لما الواحدة تشتكي لراجلها من اهله
يقول ليها
لا ياخ
دا ماقصدهم انت بس بتحبي تفسري القصص على مزاجك
تحبي المشاكل والنكد
بحبوك بس انت ماقادرة تفهمي الحاجة دي ..
معقولة امي قالت كدة !!!
اختى عمرها ما بتتصرف بالطريقة دي لازم في شيء حصل !!!
اخوي دا زول كويس في شنو اخلاه يعمل كدة … مالك معاه !!!
الواحدة تتحول من انها الشاكية والمتضررة
لانها تدافع عن نفسها
هو بكون عارفهم زي جوع بطنه
عارف تماما قصصهم وحركاتهم وتصرفاتهم
مافي زول يقول لي هم مختلفين قدامه من سلوكهم من وراه
الكلام دا يتقال عن الاصحاب الجيران ناس الشغل و الناس البتعرفوهم ساي كدة
او تكون انت مااتربيت مع ناس بيتكم عشان ماتكون عارف مشاكلهم شنو طريقة تفكيرهم .. وتصرفاتهم ونمط شخصياتهم..
بقيس الحاجة دي علي روحي دايما
لما تحصل حاجة
او حتى اقرر قرار في موضوع ..
انا بعرف لما تحصل حاجة او اكون ماشة في اتجاه محدد
بعرف امي حتتصرف كيف
اعتزاز حتقول شنو
ونوسة تعليقها في اي اتجاه
واجلال ردة فعلها حتكون عاملة شنو
والعجب هنوية اختى انا بشوف وشها عديل وهي على بعد ملايين الامبال وبسمع ضحكتها وطعمجتها ..
بعرف معز اخوي حيتعامل مع الموقف من اي جهة ورايه شنو
منو الحيدعمني منهم ومنو الحيقيف لي
دا ما لاي شيء
لاني ربيت وسطهم … وطول عمرنا سوا وعارفاهم زي ما بعرف خط يدي
وحتى لما الدنيا ودت كل زول في شارع
كان ساهل على اعرف مواقفهم …
دا حال اي زول ربى مع اخوانه وعاشوا سوا
عشان كدة الزول لما يعرس مفروض يحمي (المعاه) من ردة فعل ناس بيتهم
ايا كان سلوكهم انت بتكون عارفه
عارف
حركاتهم
وعباطتهم
وشرهم في بعض الاحيان
واحدين بكونوا ثقلاء وليئمين وحقارين ..
واحيانا من ناس بيتكم في زول مؤذي ومتحكم …
والحتات البعرفوا يدخلوا فيها البجيهم جديد دا .. وممكن يخنضلوا عليه الحياة ..
وبالمناسبة دي انا بهدي ليكم الفيديو
دا في رايي
العريس المثالي
واضح مع نفسه جدا
عروس (تعب فيها ) زول يجي جنبها مافي
لا كبير لا شافع لا يخزنون
كلكم بعيد
لا يدوها اكل ماكويس ولا يحقروا بيها
يهبب ليها بروحه من الحر
( في سخانة!!!)
نفتح شباك
نجيب مروحة
الضبان دا ما يرك فيها
كتل كل الضبان الحايم …
وقدامهم وتحت نظرهم يحبها ويخاف عليها ويهببها
ويندلق ويلمسها وعيونه يطلعن من محلتهن
ويحبها يحبها يحبها
ويعظمها ويخاف عليها منهم هم ذاتهم
دا الراجل الجد جد ..
مش البصرصروا لما يشوفوا اهلهم وينهرها ويطنشها عشان مايقولوا عليه (اضينه)
المحبة دايما تكسب
بس كدة
في سخانة !!!
كل شيء ولا السخانة
ارفعوا عنهن سبب البلاء لانو انتو عارفنه كويس ..
كلو ولا السخانة
تماضر
تمر الرضا







إرسال تعليق