بقلم / د. تماضر الحسن
إختصاصي أمراض النفسية والعصبية- كاتبة
حكي لي …
دخلت الفصل وانا طالب جديد
بتلفت زي الشافع الراح من امه في الزحمة
ابوي كان منقول جديد في البلد دي .. شايل لي شنطة دمورية فماشها ابيض خيطتها خالتي في مكنتها المختوتة في برندة حبوبتي ..
الشفع فايرين في الفصل زي البليلة
كواريك وورجغة ونضمي …
دخلت مرتبك وبتلفت
جراني من الشنطة ..
كان قاعد في اول كنبة جنب الباب ….
تعال …تعال اقعد جنبي
وانا ماصدقت … قعدت وغشاني سلام عجيب
من وكتها داك دفء رجلو اللامست رجلي وانا وهو لابسين الاردية القصيرة مافارقني …
تحسو كانه دفا قلبو … قدر يتسلل لي بقدرة قادر
وشو النحيف…لونو الاسمر … عيونو الملانات حزن وزي الفيهن باقي دموع … وشو المغبر فيهو باقي طباشير شكلو بعد مامسح السبورة قش وشه من غير ما يحس …
وبسمة
كل مااعاين ليه. يرجع يبتسم لي …
بعد شوية دق جرس الفسحة
مرق سندويتش فول ملان بصل … قطع السندويتش النص بالنص
ومداه لي بمحبة شديدة
ولما مشينا لمزيرة المدرسة وبكوز صفيح مطرقع مد لي الموية حتي قبال مايشرب
كانو بصغرو داك بحق قول الصديق لما شاف النبي الكريم عليه الصلاة والسلام بيشرب
قال (فشرب حتي ارتويت)
اها مختار استناني اشرب … وجرع باقي الموية المكدرة الحاتلة في قعر الكوز …
حينها اتاكدت انو الحيكون بيني وبين الزول دا شيء كبير
شيء اصله اللقمة والموية …
الزاد والمحنة والمحبة …
جاني احساس ميثاق حميم وصل بيني وبينه …
من يومها اتحد مصيرنا مع بعض …
داخلين ومارقين مع بعض
عرفت اهله وناس بيتهم … خفف علي سفري وبعدي من اهلي …
بالرغم من صغر اعمارنا … كان عندنا احساس عجيب بالاتحاد والمسؤولية تجاه بعض …
ياما كضبت علي ابوه لما يجي يسال منه واقوليهو فلان كان معاي اسي ومرق بصعيد الحلة ماشي علي البيت ويكون مختار الوكت داك في البحر يعوم ودا الكان ابوه بحذرو منه … بس اخلي ابوه يديني قفاه
واجري جري
اشيل جلابيتو من القيف واناديهو… مختار اجري ابوك ممكن يجي اسي تعال بسراعك … الله قال بقولك كان اتاخرت
ونضحك ولا همانا شيء
ويلبس ويقوم فللي تحاه بيتهم
مضي العمر .. انا وهو مرات النوم ذاتو ما يفرقنا
الزمن مشي بينا كعادتو .. ومختار بشطارتو اتفوق ودخل كلية كويسة. وسافر بريطانيا عشان يسوي دراسات عليا وانا دقشت السوق …
عرس قبل مايسافر ساق مرتو ومشي … شال حتة مني وسافر …
وانا عرست وسويت لي محل في السوق
والبييني وبينو زي عجين البيت
كل ما تشيل منو بركتو تزيد ..
نتكلم بالتلفون … ياهو مختار ما غيرتو بلادالخواجات
يجي اجازاتو … ساعتي وريحتي اول شيء … وانا وكت جية مختار بكون عيدي … باجز رسمي … وبتفرغ ليهو ونرجع نقعد في كنبة زمان … وبنفس القلوب ذاتها … يبدا الكلام وانا بتمه
ونضحك …
كل مااعاين ليهو اشوف كوز الموية وسندويتش الفول القسمناهو …والدنيا وكتها احن من شلوخ الامهات وادفي من بطن التكل …
في جية من جياتو …
دقش البحر كعادتو
وانا الوكت داك مشيت الصعيد امي الله يرحمها كانت بعافية
بعدها بشوية امي ماتت الله يرحمها …
قعدت في البلد شوية …
ولما جيت صادي بنص روح وجسم متهالك …
اول زول جاء في بالي مختار
مشيت علي بيتو … لقيت الصيوان …
ياربي منو المات
اخوه من شافني
بكى..
في شنو يااخوانا !!!!!!
مختار غرق …مات… البركة فيك يا النور
مفروض ابكي يعني ولا اسوي شنو انا اسي !!!!
والله شميت ريحة الشية جواي ..
شيء زي البتحرق جوه صدري … كانو نار بقت في حشاي …
حسيت انو امي ماتت تاني … جاني يتم عجيب .. وحزن كبير … و شعرت بشيء جواي ينزف
ختفت جلابيتو وجريت البحر … ناديتو وحرستو بالايام
يا مختار… عليك الله بطل عوارة وتعال مارق …
وقعدت في القيفة راجيهو …
وقفت وحنست البحر دا اكان يطرشو لي …
لكن امانة البحر ماغدار …
مسك مختار مني وابا يفكه …
ورجعت ….
خليت بقفاي كل شيء
عزاي كان ولدو وبتو الخلاهم لي …
كل مااعاين في وشيهم …
تجي صورتي وصورة مختار ….
قاعدين في كنبة الفصل الزمان ديك
(انت اخوي ياالنور)… اتاريك عارف روحك مودع بدري وبتجهزني للحمل دا يا مختار …
مش كتير علي يااخوي !!!!
نان انا اسوي شنو يا ود امي !!!
سنوات كتار مروا علي وعمر ومني اولاد مختار اقرب لي من عيالي …
عيالي شنو
اقرب من حبل الوريد …
امتداد البيني وبين الحصل في كنبة الفصل في اليوم داك …
عمر ومني انا الكبرتهم واهتميت بيهم واحساسي تجاهم واحساسهم تجاهي اقوي من احساسنا بالعندنا رابط دم بيجمع بينا
فعلا الرابط البجي عن اختيار اقوي من روابط الدم
لانو عن محبة وطواعية (واختيار)….
الالتزام فيه غير مشروط
والالتزام فيه مبني علي البتمليهو الروح
ولازال قلبي كلما ملاه العنت والرهق رغم السنين المرت دي كلها …
الروح الشاخت … والبجوه الملان جروح وكدمات … الدنيا البتجيك بقرونها …
كل ما حسيت بانو انا عاوز اخت راسي .. بخته وصورة الصبي الاسمر ابو عيون ملانه دموع تملا مني المسافة التي بين عيني ورمشي
#قصاصات من دفتر حباتهم وحياتي
تماضر الحسن
تمر الرضا
النص حقيقي مع بعض المعاملة الكريمة التي تليق باصحابه وقدرهم ومكانتهم عندي
إرسال تعليق