بقلم/د. تماضر محمد الحسن
قصة كان كتبتها عن معاناتي من زمن السودان بحناناته وقصصه وكوافيراته
الله يرجعه
____________________________________
يا حليل اجازات الكريسماس في السودان
اييييه دنيا
كان زي الوقت دا الزول لمى شنطه وانطلق ..
بتذكر في واحدة من الاجازات قبل الكورونا القبيحة
مشيت السودان .. بلدي يا حبوب
طبعا كونك تعيش في السودان حتي لو مؤقتا انت بتكون مرغم انك تعيش تحت سلطة العادات والتقاليد مهما كنت (متمرد ) عليها
وما بتكون عندك رفاهية عيشة بلد الخواجات الهنا
اولها الحنة .. في السودان لازم تتحنن
والحنة او عدمها عندها دلالات
بتجيب كلام الناس لو غابت .. وتثير الاسئلة والاستفهامات
ودا طبعا مصيبة هناك
عليك الله شوف (البساطة)
سعادة الزول واستقراره بقيسوه بالحنة !!!
المهم…
قررت امشي كوافير في كافوري جنب بيتنا عشان اتحنن ..
اخر قيافة ولطافة
والموظفات في الكوافير بنات استايل جدا
وبما انو الحنة دي تعتبر من التراث يعني
عاملين ليها محل براها
خاتين ليهم عناقريب مخرطة للزبونات
مفرشات سمحات
ملايات نضيفة كدة
والمكيف شغال ضد الشمس ا والحر العاملين حفلة ببره ديل
رقدت في واحد في امان الله …
طبعا لقلة الخبرة شكلي زي الشافع الامه راحت منه
اتلفت ساي
بعد شوية
جات الحنانة تقدل
امانة ما حقّارات الحنانات
بالذات المشهورات منهن
زي الدايات بالضبط
انا شخصيا بخاف عديل من النوع الزي دا من النسوان
بهزوا ثقتك في نفسك وما بتعرف تقول ليهم شنو
عشان تلقى فرصة مع واحدة تكون مشهورة الا تكون عندك واسطات وتكون بتتمتع بحنك سنين وجيب مليان وجلد تخين تستحمل الثقالة والحقارة ..
عاينت كدة لقيتهم كلهم بقولوا اسم واحدة طوالي علقت فيه
بس فلانة .. انا عاوزة فلانة
وفلانة واقفة في النص تعاين لينا بطنقعة شديدة جدا
والجمهور يهتف
سبحان الله
جات علي انا
المره عاينت لي من فوق لتحت
طبعا انا يديني ورجليني فاضيات اثر لحنة مافي وضفوري حلاتن زي ما الله خلقهن ..
عاينت لي كدددة .. في عيونها كل تنمر الدنيا
با حليلها .. غلبها تعرف كنه (المخلوق) القاعد قدامها دا
الشكل ما شكل عروس جديدة
وبرضو ماممكن اكون مرة بالمنظر دا علي حسب طريقة المعاينة
سالتني من.الشكل الانا عاوزاه
طبعا دا السؤال المشكلة والحير العلماء
احنا الجايين من اروبا التقول اهل الكهف .. لما نمشي السودان زمان تلقى العملة اتغيرت
الشوارع اتغيرت
الغنا اتغير
المواصلات دي بتتغير .. امجاد وهايس وماتعرف شنو
حتي الاكل والشراب في السودان بتغير كل سنة بتكون في موضة كدة ..
اها الحنة دي برضها موديلات زي العربات
والحنانة بتعرفك من اختيارك اذا كنت اهل كهف ولا ود بلد
ناولتني التلفون وبتعاين لي بتحدي
اها دايرة شنو
دايرة شنو
وانا اعرق واجف
كل مااقيف في واحدة ارفع راسي القاها لوت قدومها
وانا ثقتي في نفسي تهبط لتحت
تاني اعاين للصور
ارفع راسي لما اقيف في صورة
القاها تبرم في عيونها
بتحت تحت انا سامعاها بتقول
(غايتو جنس خرف )
الحاجات الزي دي بتشيل من ثقة الزول الاصلا مهزوزة بفعل السفر والبعد
وانا مسكينة طوالي اغير رايي وامشي للبعدها
وهي كل مره تنهرني
اها بقيتي علي شنو
تعاين للصورة الاخترتها وتعاين لجسمك ..
غايتو كان الزول عندو مشاكل نفسية عندها علاقة بعدم تقبل الشكل ياكا الانتهيت هناك
اتذكرت وصية هنوية اختي قالت لي يا تماضر اختاري اكتر شيء ما عاجبك وشايفاه شين وما مناسب ..دا حيكون الشيء الجديد والسمح
اتخيل حقارة اختي بي ..
لكن لما اضطريت والقصة قست علي سمعت وصيتها
فعلا اول شكل قلت دا شنو القباحة دي بيني وبين روحي
طوالي الحنانة قالت لي ايووووووة طيب من قبيل عاملة فيها (عبيط القرية)
ماياكي بتعرفي ..
طبعا عبيط القرية ولا يقدر يعترض
بالعكس فرحت فرح انها رضت عني اخيرا
المهم
قالت لي ارقدي
طبعا مع قلة الخبرة
رقدت زي ما بعجبني
المره دي شدة ماكوركت انا اعصابي باظت
يااخت معقولة بس
مابتعرفي ترقدي للحنة
قلت ليها وبمسكنة كدة والله انا قايلة برقدوا كدة
ماردت بس بتعاين لي
اللحظة ديك
دخلت الاوضة بنوتة حلوة من القروبات الظريفة حقتنا دي
فسخ وجلخ ودعم سريع (اها فولوا قحاتة جناح سياسي والعوارة دي )
اوووه دكتورة تماضر ازيك انا مبسوطة اني لاقيتك..ورورورورورور
انا والله التقول شفت نبي الله الخدر
نطيت من العنقريب دا طوالي
اتشعلقت فيها من المره الليئمة البتحدر لي دي
واتسالمنا انا والبت وحضنتها وبكيت (مر البكاء)
اتخيل لي انا
بكيت من المره
وبكيت من الهملة
وبكيت من الزرة وقلة القيمة
المهم بكينا قدرتنا
اظنها البنوتة الحلوة زبونة قديمة عندهم.
وبتدفع كويس
عشان كدة الحنانة صبرت لمن.حفلة الاستقبال خلصت
طبعا مستغربة في شنو حاصل
عاينت ليها يافلانة بتعرفي الزولة دي
البنوتة قالت ليها كيييييف يا فلانة انت.مابتعرفي دكتورة تماضر يعني
قالت ليها بري ما بعرفها بتسوي( خلتات )…ولا شنو
البنوتة ضحكت قالت ليها لا ياح خلطات شنو دكتورة تماضر دي زولة حلوة وتماضر دي بتعرف اي شيء
دي حبيبتنا وبتنصحنا وبتتكلم معانا وبتحل معانا مشاكلنا دي زولة بتاعت (سايكولوجي)
انا طبعا واقفة مستنية نتيجة المساجلات وبعاين بانتصار للحنانة البتحدر لي دي
وفي سري بقول ليها اها كيف وكيف
معاك سليبرتي
بابتسامة كدة
قلت ليها شفتي كيف
قامت طوالي الحنانة ودت وشها بالاتجاه التاني
وقالت ليها مخير الله …قلت لي بتعرف اي شيء … ياخ دي حنة ما بتعرف ترقد ليها ..رقدت لي رقاد الشافع للحقنة
قلت لي بتحل مشاكلكم اسي خليها تحل مشكلتها دي
بلا سايكولوجي بلا قصص فارغة تعالي هنا ارقدي
والله انا ضحكت ضحك..
يا حليل السودان ربنا يرجعنا كلنا
تماضر
تمر الرضا
إرسال تعليق