بقلم/صبري محمد علي (العيكورة)
أولاً أتمنى أن تكون الصورة أعلاه غير صحيحة أو مدبلجة أو ذكاء إصطناعي
قول لي ليه!
(لانو) في تاريخ السودان لم نجد مِنّه و لا رياء ولا سُمعة كالتي حملتها صور الكراتين أدناه:
ياخي خليك من تاريخ السودان
(عليّا النعمة)
في (ختّة) الحريم ما قاعدة تحصل
قول لي الحاصل شنو يا أستاذ؟
أقول ليك يا سيدي
(كرتونة) تتوهطها على جنباتيها صورة السيد والي ولاية النيل الأبيض الفريق الركن قمر الدين محمد فضل المولي
وعلى أحد جانبيها رمضان كريم وعلي الجانب الآخر سلّة رمضان ٢٠٢٦
والجانب العرضي من (الكرتونة) خُصِّص لكتابة المحتويات !!
آآي والله بلا خجلة
عدس ، زيت ، سكر …. الخ
صورة عديل للوالي !!
أيها الطبالون …!!
داخل مكتب الوالي
مِنّة بهذه الصورة (الفضيحة)
والخليفة الراشد الفاروق رضي الله عنه كان يتفقد بيوت المدينة خلسة ليلاً يحمل الدقيق وينفخ النار
و دموعة تنهمر
ويقول ياليت أم عمر لم تلد عمر (وإنتو) عاملنها كرتون تحمل صورة خليفتكم (قمر الدين)
(ياخي) إستحوا !!
لن ألوم الوالي على هذا المَنّ والأذى بقدر ما ألوم
حملة علب (الأورنيش) وحارقي البخور
داخل مكتبة !
هل ما ما بداخل هذه (الكرتونة) هو من حُرّ مال الوالي حتى نجد لكم العذر
أم هو ….
من مال هذا الشعب و الخيريين من أبنائه !
كيف قبلتم السيد الوالي
أن تضعوا صورتكم الشخصية في هذا الموقف المؤذي والغير كريم !
ولله در الشاعر القامة الدكتور محمد بادي العكودابي حين قال …..
حليل النافق أموالو
وتدي يمنو
وما تعرف حسابو شمال
وخليك من يعرفو فلان
كُلّو فضيلة في الأجداد
أبت ما تبقى في الأحفاد
و مسكت في النُعوش الطاهرة
وإندفنت مع الجثمان
وكل مكارم العابرين
معاهم راقده في شبرين
وبقت أمجادنا
كانوا زمان
وكانوا زمان
أستغفر الله العظيم ولاة آخر زمن
إرسال تعليق