بقلم/ تماضر الحسن
مواصلة لموضوع الصمت العقابي السلوك البغيض الهدام …
الصمت العقابي في الاغلب البمارسه معاك ما بتكون عارف ليه هو بعمل معاك كدة
مافي مشكلة واضحة ..
يعني الصمت البحصل نتيجة انك زعلت من زول وماقادر اسي تتكلم دا ردة فعل طبيعية .. تمنح مساحتك عشان تتماسك وتهدا وتبقي قادر علي الحديث
الماطبيعي انو زول يصحى من النوم ويكون صاري ليك وماعايز يتكلم
او فجاة يقرر انو ماعايز يتواصل معاك من غير سبب واضح ومخليك لهواجسك وافكارك انو البدر منك شنو
بعضهم حتي لو سالته ممكن يرفض تماما يوريك انو ليه بعمل معاك كدة
او الشخص البسكت منك حتي بعد ما تتكلم معاه في موضوع عليه خلاف يكون تمت مناقشته والكلام فيه بس هو لسه حابي يوريك انو ماعايز يتكلم معاك او بعاقبك بعدم الكلام
اي علاقة في الدنيا قد تستحمل القطيعة وعدم التحدث
الا الزواج
شخصين موجودين في نفس الحيز
وبينهم شراكة بتستدعي التواصل والكلام والمشاورة واصلا هي علاقة مبنية علي المحبة والاحتياج والونس واللطف
والتواصل …
التواصل ..
اذا المعاك دا حريص علي ابعادك منه ورفضك واقصاءك وعدم تقديرك وقدرته علي مقاطعتك والبعد عنك دا بخلق شرخ في علاقة حميمة زي دي..
وكل مازاد زمن الصمت كلما اتسعت الهوة واتباعدت القلوب
في فترة الصمت دي الشريك الانت بتعاقب فيه دا قد يمر باي ظرف يخليه في حوجة لمن يمد يده او يتحدث اليه .. قد يمرض .. قد يتعب .. وانت في داخل القوقعة الاخترتها للبعد عن شريكك .. شريكك يعرف انه لا احد خلفه ولا يهتم لامره او يشاركه حزنه وفرحه او اوجاعه .. تبدا واحدة من اسوا انواع ا لمشاعر عند الشركاء اللهي الاحساس بعدم الفايدة والقيمة عند الانت متزوجه .. عدم الانتماء للعلاقة نفسها .. وعدم الاحساس بيك وبقيمة وجودك نفسها .. واذا دخل (القنع) والزهد بيت من البيوت وقل العشم بين الازواج انتهت العلاقة واندق اول مسمار في نعشها وتبقي مسالة وقت فقط في انهيارها وتصدعها …
في بيوت كتيرة اصحابها مطلقين عاطفيا
اول اعراض الطلاق العاطفي هو الصمت دا نفسه
اي ازواج ما بعرفوا يتونسوا مع بعض ولا بحتفوا ببعض
وما بحبوا الكلام مع بعض
بلقوا ضالتهم بره بيوتهم من اصحاب واهل وناس وبحبوا يكونوا معاهم بعيد من بيوتهم ديل اكتر ناس موجودين في شراكات صورية ماعندها علاقة بالزواج الحقيقي..
اي زول بلقي راحته في الصمت من الشريك المعاه وبقول الحمدلله الله ريحني من الكلام والنقة والكواريك … واكتفي بوجوده كجسد جوه بيت زي دا .. بتعامل معاه كواقع مفروض فقط دا بني ادم ماعندو فكرة حتي كيف تنشا البيوت
وكيف ممكن نكون مثال جيد قدام اولادنا في اننا رمز للمودة والرحمة دي..
اي شركاء صامتين من بعض تخوفا من انو تقوم مشكلة بيناتهم اذا تكلموا مع بعض السقف اللاميهم دا حينهار. في اي زمن عليهم لانو مافي حياة بين ناس في اي حيز من غير تواصل .. والسبب المخليهم يصبروا علي قلة التواصل او انعدامه ايا كان سواء
خوف علي انو اولادهم يخسروا بيت فيه ام واب
او خوف من المجتمع في انو الناس تتكلم عنهم وفشلهم في اقامة البيت دا
او لانو اهلهم ما حيدعموا فرقة زي دي
او خايفين من مواجهة الحياة لقدام في فترة ما بعد الطلاق ..
الاسباب دي بعد شوية ما حتكون كافية عشان تكون دافع في الاستمرار في علاقة فيها حميمية وعدم خصوصية بتفضح عدم وجودها بانك ما بتكون عارف العايش معاك دا بعمل في شنو
بتسمع اخباره من الناس
بتشوفه بجري لغيرك بحثا عن الايناس والسلوى والملاذ
بتتفاجا بمواضيع وقصص وخطط بكلمك بيها زول تاني وانت اخر من يعلم …
بفتش في غيرك عشان يساعدوه لما تحصل ليه كارثة او مصيبة
الصمت العقابي عدو الثقة الاول
عدو الامان والحماية
عدو الاحترام
اول عتبات الكراهية والغبن والالم والوجع البتفضي الي انهيار العلاقات
تماضر
تمر الرضا..
إرسال تعليق