بقلم / الدكتورة تماضر الحسن
“اختصاصي الأمراض النفسية والعصبية”
امس القريب كانت في ندوة تحاورية اسفيرية عن طريق الزوم انا كنت محظوظة بانه تم اختياري اني اقدمها للجالية السودانية بولاية فكتوريا باستراليا … الندوة كانت بعنوان
الصحة النفسية والتكيف مع تحديات الهجرة
من البداية اي شيء تم بطريقة سلسة ومهنية تسر وتعجب .. الاستاذة سارة حماد المسؤولة عن مكتب المراة والطفل في اللجنة التنفيذية لجاليتهم الموقرة
تواصلها لغتها الطريقة النسقت بيها الموضوع
الاصرار والمثابرة انها ترسل لي وانا اكتر زول جدوله ملخبط …
فارق الزمن بينا
وضوح الرؤية العندها ومعرفتها بالعايزه تقدمه لافراد جاليتها الكريمة
الشغف العندها بالعمل العام والتزامها بالهي عايزه تديه
والله اثار اعجابي وحفز شهيتي للعمل
لحدي مااتلاقبنا امس … من اول مادخلت .. الطاقة الموجودة في المكان محفزة وبسيطة واصحابها راغبين فعلا في التواجد …
انا بني ادم بتحصل ليه عدوى سريعة من الجو اللطيف الطيب الملان محبة وسلام
الباشمهندس محمد بشير رئيس موكب الجمال دا وبقود الجالية الكبيرة دي .. خطابه الابتدر بيه اللقاء .. كاريزمته … تقديره وتثمينه … خت خط واضح جدا لكل المشت عليه الندوة لحدي نهايتها … اللفت انتباهي انه كل الاتداخلوا ابدوا تقديرهم ومحبتهم ليه ودا ان دل علي شيء بدل علي انه عرف انه يتحصل علي احترامهم فبل اي شيء تاني ..
اتعودت في معظم اللمات واللقاءات العملتها خلال العشرة سنين الفاتت سواء اسفيريا او بالحضور الفعلي مع جاليات ومجموعات ومنظمات وغيرها انو الحضور بكون سيدات تفوقا علي عدد الرجال وفي احيان كتيرة بكونوا سيدات فقط …
المره دي كان الحضور فيه الجنسين واصرارهم علي المشاركة والتداخل والحديث كلاما وكتابة وتعليق …
طريقتهم كانت جميلة جميلة جميلة
النقاش ثر ومفيد
الابواب التم فتحها قدامي باسلوبهم اللطيف رصف الطريق بعذوبة لقلوب المتلقين ديل نفسهم .. وخلاني اكثر قدرة علي تقديم كل البعرفه وكل العندي ..
لقاء امتد لاكثر من تلاتة ساعات واحنا كنا متفقين علي ساعتين
لكن انا كنت مستمتعة بالبحصل قدامي وبوعيهم وبمعرفتهم وبطريقة تحاورهم والاسئلة البتوري انو ذاتي مفروض اقعد قدامه واتعلم فانتهزت الفرصة فعلا عشان اضيف للعندي دا الكتير والكتير
بعدها رسلت لي سارة الفيدباك حقتهم للتم تقديمه واسعدوني والله ووروني انو انا فعلا بحصد (فيما زرعت وازرع) ..
ممتنة لكمية المحبة واللطافة دي
في حضرة جلالك يطيب الجلوس مهذب امامك
الامتنان والمودة ليهم جميعا
خليكم عارفين انكم كبرتوني وعظمتوني وفرحتوني
ولي معاكم لمات ولمات لحدي ما نتلاقى بالسكة باذن الله
كل محبتي
تماضر
تمر الرضا
إرسال تعليق