يلا ركبوا لى السلاليك
يلا ازرعوا للجباريك
البشيل براهو بتعب
حتى لوكانت مسوايك
الجباريك ساحة ضيقة
يأخ جبريل مابتكفيك
أنت ما داير تصدر..؟
وتملأ خزنتنا بالشيك
السياسة بفت عقيمة
والفلاسفة ما بتخليك
كل وزير عامل مفتح
إلا شغله كله شربيك
ناس تلتق وناس تفتق
يلا لى زمن المراحييك
ناس تحلل ناس تضلل
كله شان نرضى عليك
ناس تقرر دون تخطط
ناس ترجع للمفاريك
ناس تكضب او تعذب
زولا أحلف ما اخليك
الزراعة بقت مصيبة
والجباريك ما حتديك
المشاريع بيها وفرة
واقتصادها هو البعليك
الجباريك جد صغيرة
أنت واحد ما بتكفيك
المشاريع فيها إنتاج
كل زولا خيرو بديك
يا جبريل أنت جادى
الجباريك ما حتغنيك
المشاريع هى البتنتج
ادعم الجاز ربى خليك
ولا داير تنزع الأرض
من مزارع كان بيحميك
ولا داير اللعبة تنشك
وتشيل ليك جباريك
ياخى حرر لينا دارفور
امش ازرع ليك تنابيك
نحن نزرع عيش وسمسم
كله شأن الجيش نغذيك
نزرع الفول والقطن
بى قطننا شأن نكسيك
نحن يا جبريلنا خبرة
نحن دايرين نوريك
البلد بكتوفنا قامت
محاصيل خيرا يكفيك
حكموا الخطط السليمة
ما تسوى ضرب دلاليك
البلد محتاجة نهضة
والزراعة هى البتديك
وفروا الجاز للمزارع
والضمانة تكون بشيك
والسياسة بقت خبيثة
ما بتعرف من يعاديك
والجنيه ما عندو قيمة
الا نزرع شأن نغذيك
والحرب الدائرة ذاتها
اقتصادها هو البينهيك
الخزينة العامة فاضية
ما فيها دهبا… يحميك
الدهب سرقوهو كله
الإمارات هى بتوريك
الدهب سبب البلاوى
الموارد هى البتحميك
البلد ما دايرا زولا فى
قرارو كما الجباريك
دايرة زولا فكرو ثاقب
احلحل عقد المشابيك
خلى إحسانك يسبقك
ما تسبقك يوم مساويك
اقتصاد منهار وواقع
والجنيه هو البوريك
البلد يا جماعة ضاعت
الحقو باقى الجباريك
يلا يا جبريلنا شتت
الجنيه حالف يقاضيك
العليش الطريفى محمد
مدنى/ بتاريخ ٢٠٢٦/٠٦/٢٢م
ulaish201488@gmail.com
إرسال تعليق