بقلم/صبري محمد علي (العيكورة)
(ماهووو) ….
لا يمكن (إنتا) أيها الرجل الفلّته و (أنتي) أيتها المرأة الصنديدة
تكونوا (بتاعين كُلّو) !!
فقط لأنك إمتلكت هاتف ذكي وشبكة مُترعة !
ما ممكن ياخ …
كل هذه (الموسوعية)
الإقتصاد
الصواريخ
الباثولوجي
البورصات
الوزير المنصوري
كأس العالم
العلاقات الدولية
آدم شيّة
الطاقة الشمسية
(إنتا منو ياخ)
وإنتي منو يا أمة الله !
(أدوا) الناس فرصة تشتغل!
والما ليك فيهو ما تتكلم فيهو
والفلاحة (البلحيل) دي ما حبابا
ياخ معقول ياخ
(عقدّتو) الوزراء و المسؤولين
وكترة (النّجيه) بتكسر الحجر
يا جماعة شوفوا ليكم شغلة غير (الموبايلات) دي
خلّوا البلد تنطلق !
يا جماعة معقول كلنا بقينا خُبراء وعلماء و بتاعين طيارات
تراجع الجيش في موقع ما
أصبح السودانيون كلهم محللين عسكريين !
سقطت طائرة
حتى (بلّه) سيد اللّبن قال رأيه
تعطل محول كهرباء في الحي الفلاني
(كييييف) !! يحصل الكلام ده وتنساب الحلول كالماء من فم السُقاء
حبوبتنا (رحمها الله)
كانت إذا كان أحدنا يتحدث بصوت عالي ومزعج أثناء غسيلها للعدة مثلاً و تصادف أن إنزلق صحن و إنكسر
تُحمِّل المسؤلية بنسبة ١٠٠٪ علي المُزعج (النبّاح)
على حد تعبيرها
(بلا) نبيحكم ده
الكسر الصحن شنو؟
(فاااا) يااااا ….
أبو فلان
يا أم فلان
بطِّلوا النبيح ده خلُّو الحكومة تشتغل
(المعقول معقول يا جماعة)
(٤٥ مليون عالم وعبقري وطيار وسياسي بالسودان)!!!
(لا حول ولا قوة إلا بالله)
السبت٤/يوليو ٢٠٢٦م
إرسال تعليق